Read Tayta Diosninchi Isquirbichishan Salmos 107 Bible Online

Salmos 107 - Tayta Diosninchi Isquirbichishan bible

Salmos 107

¹TAYTA DIOSTA agradësicuy-llapa amatar alli cashanpita. Pay cuyacoj caynenga imaycamapis chaynöllami.

²TAYTA DIOS salbashan cajcuna willacuy chiquishojcunapita Tayta Dios salbashushayquita,

³llapan nasyuncunapita allpapa juc cantunpita jucaj cantuncama shuntashushayquita.

⁴Waquenga paycuna chunyaj chaqui jirca agush-agush allpapa pantacasha purircaycaran tiyananpaj siudäman näni aywajta ashir.

⁵Yargaypita, yacunaypita wañunanpäna carcaycaran.

⁶Chayno llaquicurnami TAYTA DIOSTA mañacuran. Chaura Tayta Diosga ñacaycunapita jorguran.

⁷Nircur alli nänita tarichiran tiyananpaj caycaj siudäman chayananpaj.

⁸Chaymi TAYTA DIOSTAGA agradësicuy cuyapäcoj cashanpita, runacunata cuyapar yanapashanpita.

⁹Paymi yacunaycajtapis yacuta tarichin. Muchuycho caycajtana achca micuyta tarichin.

¹⁰Waquenga paycuna llaquisha carcaycaran. Jucta sirbir goyarcaycaran. Manami camäpacuranchu imata ruraytapis ni mayman aywaytapis.

¹¹Paycunaga Tayta Dios willapashanta manami wiyacushachu caran. Tayta Dios rurananpaj caycashanta manacajman churaran.

¹²Chaymi Tayta Diosga fiyupa ñacay aruycunaman churaran. Mana alliman chayaptin mananami pipis yanapajnachu.

¹³Chayno llaquicuycho car-rämi TAYTA DIOSTA mañacuran. Chaura paynami ñacaycunapita salbaran.

¹⁴Paycunataga llaquisha caycajta jorguran. Jucta sirbir ñacarcaycajta salbaran.

¹⁵Chaymi TAYTA DIOSTAGA agradësicuy cuyapäcoj cashanpita, runacunata cuyapar yanapashanpita.

¹⁶Paymi acapa-acapa rurariran runsi puncucunatapis. Fyërru rancancunatapis acapa-acapa paquiriran.

¹⁷Paycuna waquenga juchanpita gueshyarcaycaran, llaquicurcaycaran.

¹⁸Llapan micuytanami melanaran. Wañunanpänami carcaycaran.

¹⁹Chayno llaquicuycho carnami TAYTA DIOSTA mañacuran. Chaura paynami ñacaycunapita salbaran.

²⁰Allchacächiyta munallarmi allchacächiran. Sepultüraman chayananpaj caycajta allchacächiran.

²¹Chaymi TAYTA DIOSTAGA agradësicuy cuyapäcoj cashanpita, runacunata cuyapar yanapashanpita.

²²Tayta Diosta agradësicushpayqui uywacunata pishtay. Ima rurashancunatapis cushicushpayqui willacuy.

²³Paycuna waquenga büquicunata rantiran. Nircur chaycunawan juc-lä nasyuncunacho nigusyuta aruran.

²⁴Lamar chaupichöna caycashpan ricaran TAYTA DIOS fiyupa almiraypajcunata camashanta.

²⁵Tayta Dios rimarcuptin fiyu wayra gallaycuran. Chaywanmi lamar yacu löcuyaran.

²⁶Chaymi yacuga büquicunata syëlucama jitariran. Cutirnami lamar yacu rurincama chayaran. Mana alliman chayananpaj cashanta musyaptinmi büquicho aywajcunapaga balurninpis mana carannachu.

²⁷Chay runacuna machashano tapra-tapra carcaycaran. Yachaj caynincunapis yangami caran.

²⁸Chayno llaquicuycho carnami TAYTA DIOSTA mañacuran. Chaura paynami ñacaycunapita salbaran.

²⁹Löcu wayratapis wall-wallyaycajllaman Tayta Diosga ticrachiran. Yacu löcuyaycajpis chawacäcuran.

³⁰Yacu mana cuyucuptinna paycunaga cushicuran. Maymanpis chayayta munashanmanmi Tayta Dios chayachiran.

³¹Chaymi TAYTA DIOSTAGA agradësicuy cuyapäcoj cashanpita, runacunata cuyapar yanapashanpita.

³²Shuntacaycur llapaniqui alabay. Mandajcuna shuntacashanchöpis alabay.

³³Tayta Diosmi ticrarachin mayucunata, pucyucunata chunyaj chaqui jircaman, chaqui pachaman.

³⁴Alli chacracunatapis agushman ticrachin chaycho tiyajcuna mana allita ruraptin.

³⁵Ichanga chunyaj chaqui jircatana ticrachin gochaman, chaqui pachacunatana pucyucunaman.

³⁶Chayman tiyachin yargaycajcunata. Chaura paycunanami chaycho jatarachin siudänincunata.

³⁷Chacracho arur übasta lantan. Wayuynintana aypallata shuntan.

³⁸Tayta Dios bindisyunta gon runacuna aypallaman mirananpaj. Uywancunapis mana ushacaypa miran.

³⁹Ñacaptin, mana allicuna chayaptin, gueshyawan wañuptin, wallcayaptin

⁴⁰ñacachejcunata Tayta Diosga manacajman churar castigan. Chunyaj näni mana cashanpa purichirmi ogracächin.

⁴¹Pobricuna llaquicurcaycajtami ichanga Tayta Dios alliman churan. Chay famillyacunatana Tayta Diosga uyshatano aypallaman mirachin.

⁴²Chayta ricar, alli runacunaga cushicun. Fiyu runacuna ichanga imano yarpachacuytapis mana camäpacunchu.

⁴³¿Piraj yarpaysapa yachajcuna? Yarpaysapa yachajcunaga cay willapacunata tantiyajcunami, TAYTA DIOS cuyacoj cashantapis tantiyajcunami.