Read Tayta Diosninchi Isquirbichishan Salmos 109 Bible Online

Salmos 109 - Tayta Diosninchi Isquirbichishan bible

Salmos 109

¹David isquirbishan alabansa. Tayta Dios, mañacaycämuptëga ama upällalla cacuychu.

²Llullacunami, fiyucunami washäta parlarcaycan. Nogapäga manami rasun cajtachu riman.

³Fiyupami chiquipäman. Chaymi imatapis mana rimapaycaptillä tucuyta niman.

⁴Noga cuyar paycunapaj mañacuycaptëpis conträmi ricacusha.

⁵Allita rurashäpitami mana alliwan cutichimasha. Cuyashäpitami chiquircaycäman.

⁶Chay runacunapäga jueznintapis churapay mana alli runata. Quiquinpa abogädullan ticrapächun.

⁷Demanduchöga quiquinta «juchayoj canqui» nichun. Mañacushanpis cachun quiquinta mana alli chayanallanpaj.

⁸Wallcallatana cawachun. Pay rurananpaj cajtapis jucna rurachun.

⁹Wamrancunapis waccha quëdachun. Warminpis biyüda cachun.

¹⁰Wamrancunapis guella car caridäta mañacullarna purichun. Juchusha caycaj wasincunapitapis garguchun.

¹¹Ristajcuna ima-aycantapis guechurcur apacuchun. Jäpa runacunana guechur apacuchun ñacar arushancunatapis.

¹²Pipis ama cuyapächunchu payta ni quëdaj waccha wamrancunatapis.

¹³Paycunapita mirajcunapis chayllachöna ushacächun. Chay apillïduga illgächunna.

¹⁴Taytan mana allita rurashanta TAYTA DIOS yarpaycuchun. Maman juchata rurashanpis ama imaypis gongacächunchu.

¹⁵Chayno mana allita rurashantaga TAYTA DIOS imaypis yarparaycächun. Cay pachachöga jutintapis para-simri gongachun.

¹⁶Chay runaga imaypis manami cuyapäcuyta yachashachu. Pobricunata, umildicunata, llaquicuycajcunatapis wañuchinancama gaticachaj.

¹⁷Runa-masinpäga «maldisyun chayachun» nej. Chaypita quiquinman maldisyonga chayachun. Juccuna bindisyunta chasquinantapis manami munajchu. Chaypita quiquinpis bindisyunta ama chasquichunchu.

¹⁸Maldisyonga intërunta pitucurcuchun röpano. Pachanmanpis yaycuchun yacuno. Tullunmanpis asëtino chayachun.

¹⁹Maldisyonga chapacurcuchun punchuno. Wachcu apritajno nanächichun.

²⁰TAYTA DIOS chayno castigachun conträcunatawan, washä rimajcunata.

²¹Gam ichanga TAYTA DIOS pï-maypis rispitashunayquipaj nogata alli ricamay. Cuyapäcoj cashpayqui salbamay.

²²Pasaypa pobrimi, pishipacaychömi caycä. Shongöpis fiyupami llaquicuycan.

²³Llantuy illgacäcojnömi ruracaycä. Chüpacatanömi wayrapis apaycäman.

²⁴Mana micuptëmi gongurnëpis sicsicyaycan. Pasaypa chaquishanami caycäpis.

²⁵Runacuna asipänanmi cä. Ricäramar asipämashpan umantapis jajtachinraj.

²⁶TAYTA DIOSLLÄ, yanapaycallämay. Cuyapäcojmi canqui. Salbaycamay ari.

²⁷TAYTA DIOS llapan musyachun gam llapanta maquiquiwan rurashayquita.

²⁸Nogataga manami imapis gocamanchu maldisyun chayamaptinpis. Tayta Dios gam ichanga bindisyunniquita goycamay. Noga sirbir cushicuptë paycunaga pengacuchun.

²⁹Chiquimajcunaga llapan pengaycho cachun. Pengayga ushajpaj pitucurcuchun.

³⁰Imaycamapis TAYTA DIOSTAGA agradësicuycäshämi. Aypalla runacunapa chaupinchömi alabashaj.

³¹Payga pobricunapa faburninmi. Contrancuna jitarpunanpitami salban.