Read Tayta Diosninchi Isquirbichishan Salmos 115 Bible Online

Salmos 115 - Tayta Diosninchi Isquirbichishan bible

Salmos 115

¹TAYTA DIOS, gamlla alabasha cay ari. Ama nogacunataga alabamächunchu. Gamtaga alabashunqui cuyapäcoj cashayquipita, rasun cajta ruraj cashayquipitami.

²Juc-lä nasyun runacunaga asipämar «¿maytaj Diosniqui?» nir tapuman.

³Tayta Diosnëga syëluchömi caycan. Payga munashan cajta llapantami rurasha.

⁴Tayta Diosta mana rispitaj runacunapa ïduluncunaga caycanmi goripitapis, guellaypitapis. Ïduluncunaga runa rurashallanmi.

⁵Shimin captinpis manami rimanchu. Ñawin captinpis manami ricanchu.

⁶Rinrin captinpis manami wiyanchu. Sengan captinpis manami mayanchu.

⁷Maquin captinpis manami aptanchu. Chaquin captinpis manami purinchu. Chaycunapa shiminpitaga manami imatapis wiyanchïchu.

⁸Chay ïdulucunanömi caycan chay ïdulucunata rurajcunapis. Chay ïdulucunanömi caycan chay ïdulucunaman yäracojcunapis.

⁹Israelcuna gamcunaga TAYTA DIOSLLAMAN yäracuy-llapa. Paymi yanapämanchi, imapitapis chapämanchi.

¹⁰Aarón casta cüracuna TAYTA DIOSMAN yäracuy. Paymi yanapämanchi, imapitapis chapämanchi.

¹¹TAYTA DIOSTA rispitajcuna payman yäracuy. Paymi yanapämanchi, imapitapis chapämanchi.

¹²TAYTA DIOS noganchïta yarparcamashcanchïmi. Bindisyuntami gomäshun. Bindisyuntami gonga llapan Israelcunata. Bindisyuntami gonga llapan Aarón casta cüracunata.

¹³Bindisyuntami gonga payta rispitajcunataga. Bindisyuntami gonga jatunta tacshatapis.

¹⁴TAYTA DIOS yanapaycushunqui gamcunapis wamrayquicunapis aypallaman miranayquipaj.

¹⁵Syëluta, cay pachatapis camaj TAYTA DIOSGA gamcunata bindisyunta goycushunqui.

¹⁶Quiquin TAYTA DIOSPAMI syëluga. Cay pachatanami runacunata goycusha.

¹⁷Wañojcunaga usharäcunnami. Paycunaga cay pachacho mananami Tayta Diosta alabannachu.

¹⁸Noganchïmi ichanga alabaycäshun cananpis imaycamapis. ¡Aleluya! ¡Tayta Diosga alabasha cachun!