Read Tayta Diosninchi Isquirbichishan Salmos 116 Bible Online

Salmos 116 - Tayta Diosninchi Isquirbichishan bible

Salmos 116

¹TAYTA DIOSTAMI fiyupa cuyä ruwacushäcunata wiyashanpita,

²mañacushäta wiyar yanapämashanpita. Chaypitami cawashäcamaga payta mañacushaj.

³Wañuyga pasaypanami tumapaycämaran. Chaymi wañuytaga manchacurä. Fiyupami llaquicurä.

⁴Chaynöpami TAYTA DIOSTA mañacurä «TAYTA DIOS wañuypita salbaycamay» nir.

⁵TAYTA DIOSGA allita rurajmi, cuyapäcojmi. Tayta Diosninchëga alli shongumi.

⁶Pïninpis mana cajcunata TAYTA DIOSGA yanapanmi. Nogatapis callpaynaj caycaptëmi salbamaran.

⁷Cananmi ichanga, imatapis mana yarpachacuypana goyäcö. Nogataga TAYTA DIOSMI alli ricamasha.

⁸Wañuypitami salbamasha. Wagar goyänäpita, mana alliman chayanäpitami salbamasha.

⁹TAYTA DIOSTAMI wiyacushaj cay pachacho cawashäcamaga.

¹⁰«Fiyupami llaquicuycä» niycashpäpis Tayta Diosmanmi yäracuycarä.

¹¹Imata ruraytapis mana camäpacurmi «runaga llapanpis llullallami» nirä.

¹²TAYTA DIOSTA ¿imanöparaj pägäman chay-jinanpa yanapämashanpita?

¹³Tayta Diostaga agradësicuyllami agradësicushaj. Paytami mañacushaj.

¹⁴TAYTA DIOSTA aunishätaga acrashan runacunapa ñaupanchömi cumlishaj.

¹⁵TAYTA DIOSGA fiyupami llaquicun payta sirbej runa wañuptin.

¹⁶TAYTA DIOS, nogaga cä sirbishojniquimi. Nogaga cä sirbishojniqui warmipa wawanmi. Gammi rachirgärishcanqui liyaraycämaj wascacunatapis.

¹⁷Agradësicushpämi ofrendacunata garashayqui. Nircur cushicushpä gamllatanami alabashayqui.

¹⁸TAYTA DIOSTA aunishätaga cumlishämi acrashan runacunapa ñaupanchöpis,

¹⁹TAYTA DIOSPA Templun puncucho, quiquin Jerusalencho. ¡Aleluya! ¡TAYTA DIOSGA alabasha cachun!