Read Tayta Diosninchi Isquirbichishan Salmos 119 Bible Online

Salmos 119 - Tayta Diosninchi Isquirbichishan bible

Salmos 119

¹Cushishami cawanga juchata mana rurajcunaga, TAYTA DIOS yachachishancunata cumlejcunaga.

²Cushishami cawanga Tayta Diospa estatutuncunata wiyacojcunaga, llapan shongunpa Tayta Diosman yäracojcunaga,

³juchata mana rurajcunaga, Tayta Diospa caminullanpa purejcunaga.

⁴Tayta Dios, gammi willapashcanqui llapan nishayquicunata mana pantaypa cumlinanpaj.

⁵¡Ima alliraj canman layniqui nishanta cumliptë!

⁶Mandamintuyqui nishanta cumlerga manami imapitapis pengacushächu.

⁷Alli jusgaj cashayquita sumaj yachacurcorga llapan shongöpami alabashayqui.

⁸¡Layniquitami cumliyta munä! ¡Ama cachaycamaychu ari!

⁹¿Imanöparaj mösuga juchata mana ruraypa cawanman? Gampa palabrayquita wiyacushpanmi juchata mana rurangachu.

¹⁰Nogaga llapan shongöpami gamman yäracamö. Ama camacaycachiychu mandamintuyquicunapita pantacänätaga.

¹¹Gam aunimashayquitaga llapan shongöpa yarparaycä juchata mana ruranäpaj.

¹²¡Alabasha cay TAYTA DIOS! ¡Layniquicunata yachaycachimay!

¹³Nogaga willacushämi imano jusganayquipäpis nishayquitaga.

¹⁴Estatutuyquicunata cumlerga ima-aycatapis charar cushicushäpita masrämi cushicushaj.

¹⁵Willapämashayquicunata cumlinäpämi yarpachacushaj. Caminuyquipa puriyta manami gongashächu.

¹⁶Layniquicunata cumlirmi cushicushaj. Palabrayquitaga manami gongashächu.

¹⁷Nogaga gamtami sirbiycä. Cawachimay ari. Palabrayquitaga wiyacushämi.

¹⁸Alli yarpayta gomay yachachimashayquicunata sumaj tantiyanäpaj.

¹⁹Cay pachachöga gorpallami caycä. Nogataga mandamintuyquicunata yachaycachimay ari.

²⁰Imano y imapita jusgashayquitapis musyayta munarmi imay örapis yarpachacuycä.

²¹Gamga piñacunquimi mana wiyacojcunata, mana allita rurajcunatapis. Paycunaga mandamintuyquita manami cumlinchu.

²²Paycuna achäquita ashipämänanpita, manacajman churamänanpita salbaycamay. Nogaga estatutuyquicunatami cumlishcä.

²³Munayniyoj runacuna mana allita ruramayta yarpaptinpis nogaga layniquicunallatami yarparaycä.

²⁴Estatutuyquicunata cumlir noga fiyupa cushicö. Chaycunami nogataga tantiyachiman.

²⁵Wañuycänami. Allchacaycachimay ari palabrayquicho aunimashayquino.

²⁶Imano goyaycashätapis gamtami willashcä. Gamnami wiyamar yanapämashcanqui. Layniquicunata yachaycachimay ari.

²⁷Willapämashayquicunata cumlinäpaj sumaj yarpayta goycamay. Almiraypajcunata rurashayquitami tantiyayta munä.

²⁸Fiyupa llaquicuywanmi wagaycä. Palabrayquicho niycashanno alli goyaycachimay ari.

²⁹Llullacunätaga ama munaycuychu. Chaypa ruquenga yanapaycamay yachachimashayquinölla.

³⁰Nogaga acrashcä alli cajta rurar goyänäpämi. Chaymi alli jusgashayquita yachacuyta munä.

³¹TAYTA DIOS, estatutuyquicunatami cumliycä. Pengaycho canäpäga ama cachaycamaychu.

³²Shongöta cushicachiptiquimi mandamintuyquicunataga cushisha cumlë.

³³TAYTA DIOS, yachachimay layniquicunata imano cumlinäpäpis. Wañunäcamami cumliyta munä.

³⁴Tantiyachimay yachachimashayquicunata mana gonganäpaj. Llapan shongöpami wiyacuyta munä.

³⁵Mandamintuyqui nishanno cumlinäpaj yarpayta gomay. Chaycunata cumlirmi cushishalla goyäshaj.

³⁶Estatutuyqui nishallanta ruranäpaj yarpächimay. Ama camacächiychu suwacullar rïcuyänäpäga.

³⁷Ama cachamaychu manacajcunallaman ricaränätaga. Cawachimay ari gam munashayquino caminullayquipa purinäpaj.

³⁸Sirbishojcunataga allilla goyächinayquipämi aunirayqui. Nogatapis allilla goyächimänayquipaj aunimay ari.

³⁹Ama camacächiychu manchacushä pengayman chayanätaga. Gam jusgashayquicunaga llapanpis allimi.

⁴⁰Nogaga mandamintuyquicunata sumaj yachacuytami munä. Cawachimayraj ari. Gamga alli juezmi canqui.

⁴¹TAYTA DIOS aunimashayquino musyachimay cuyacoj, salbacoj cashayquita.

⁴²Chaynöpami achäquita ashipämajcunataga cutichishaj. Gampa palabrayquimanmi yäracö.

⁴³Ama gongaycachimaychu rasun cajta parlanäpaj caycajtaga. Gam jusganayquipaj cajllamanmi nogaga yarparaycä.

⁴⁴Imaycamapis yachachimashayquicunallatami cumliyta munaycä.

⁴⁵Chayrämi goyäshaj mana yarpachacuypa. Nogaga willapämashayquicunatami cumlishcä.

⁴⁶Estatutuyquicuna imano niycashantapis raycunapa ñaupanchömi willacushaj. Mana pengacuypami willacushaj.

⁴⁷Nogaga mandamintuyquicunata cushicurmi cumlë. Chaycunata cumlirmi fiyupa cushicö.

⁴⁸Nogaga cushishami mandamintuyquitapis chasquicö. Layniquicunatapis manami gongächu.

⁴⁹Nogata nimashayquicunataga yarpaycuy. Nogaga palabrayquimanmi yäracuycä.

⁵⁰Llaquicuycho caycashä örapis aunimashayquimi cushicachiman.

⁵¹Mana rispitacojcunami mana jamaypa achäquita ashipaycäman. Nogami ichanga yachachimashayquicunata mana gongächu.

⁵²Ñaupata jusgashayquicunatami yarpaycä. Chaycunami shacyächiman.

⁵³Yachachicuyniquita cachaycoj fiyu runacunaga fiyupami rabyachiman.

⁵⁴Cay pachachöga gorpallami tiyä. Layniquicuna alli cashantami willacushaj.

⁵⁵TAYTA DIOS, chacaycunapis gamtami yarpä. Yachachishayquicunatami cumliyta munä.

⁵⁶Willapämashayquicunataga wiyacuycämi.

⁵⁷TAYTA DIOS, gamllamanmi yäracaycämö. Palabrayqui imanöpis nishanta cumlinäpämi aunishcä.

⁵⁸Llapan shongöpami gam munashayquino goyashcä. Aunimashayquino alli ricamay ari.

⁵⁹Imanöpis cawashätami yarpachacushcä. Chaymi estatutuyqui nishancunatana wiyacushaj.

⁶⁰Jucllami cumlishcä mandamintuyquicunataga.

⁶¹Fiyucunaga tucuy-jinanpami achäquita ashipämasha. Chaypis manami gongashcächu yachachicuyniquitaga.

⁶²Pullan pagas jatarcurmi gamtaga mañacö alli jusgacoj cashayquipita.

⁶³Nogaga allimi ricanacö gamta rispitashojcunawan, willapashayquita cumlejcunawan.

⁶⁴TAYTA DIOS, cay pachachöga llapantami cuyanqui. Layniquicunatapis masta yachaycachimay ari.

⁶⁵TAYTA DIOS, palabrayquicho niycashannömi nogataga alli ricamashcanqui.

⁶⁶Alli fisyuyoj, yarpaysapa canäpaj yarpayta goycamay. Nogaga yäracö mandamintuyquicunamanmi.

⁶⁷Manaraj mandamintuyquicunata wiyacushäcamaga achcatami llutancunata rurarä. Cananmi ichanga palabrayquicho nishannöna cumliycä.

⁶⁸Gamga allimi canqui. Allitami ruranqui. Layniquicunata yachaycachimay.

⁶⁹Mana rispitashojcunaga mana cajtami jitapäman. Chaypis nogaga llapan shongöpami willapämashayquicunata cumlë.

⁷⁰Mana rispitashojcunaga llutallantami yarpanpis. Nogami ichanga cushicö yachachicuyniqui nishanta cumlir.

⁷¹Nogapäga allimi casha pengayman churamashan. Chaynöparämi layniquicunata yachacushcä.

⁷²Nogapäga waranganpa guellaypitapis goripitapis mas allimi gam yachachimashayquega.

⁷³Quiquiquimi ruramashpayqui formacächimarayqui. Yarpayta goycamay ari mandamintuyquicunata yachacunäpaj.

⁷⁴Gamta rispitashojcunaga ricamashpan cushicongami. Nogaga palabrayqui niycashanmanmi yäracö.

⁷⁵TAYTA DIOS, nogaga musyämi llapanpita alli jusgaj cashayquita. Quiquë imatapis rurashäpitami ñacachimanquipis.

⁷⁶Cuyacoj cayniqui nogataga cushicachimächun aunimashayquino.

⁷⁷Cuyapäcoj cashayquita musyachimänayquipaj cawachimay. Nogaga yachachicuyniquita cumlirmi cushicö.

⁷⁸Mana rispitacojcunaga pengaycho cachun. Paycunaga jitapämallarmi ñacaycächiman. Nogami ichanga willapämashayquicunallata yarparäcushaj.

⁷⁹Gamta rispitashojcunaga, estatutuyquita cumlejcunaga nogawan shuntacächun.

⁸⁰Gampa layniqui niycashallanman shongöpis yarpächun. Chaynöpami imapitapis mana pengacushächu.

⁸¹Salbamänayquitami pasaypa shuyaraycä. Palabrayquimanmi yäracuycä.

⁸²Gam aunimashayquita ricchacuycaptillämi ñawëpis chulluycan. Chaymi «¿imayraj shamunqui shacyächimänayquipaj?» në.

⁸³Llapan gongashana auquinna cashpäpis, gampa layniquicunataga manami gongärächu.

⁸⁴¿Imaycamaraj awantashaj? ¿Imayraj jusganqui gaticachämajcunataga?

⁸⁵Mana rispitashojcunami y yachachicuyniquitapis mana wiyacoj runacunami mana alliman chayanäta munaycan.

⁸⁶Yanapaycamay ari. Imatapis mana rimapaycaptëmi gaticacharcaycäman. Gampa mandamintuyquega llapanpis rasun cajllami.

⁸⁷Ichicllapami pishisha wañunäpis. Chayno caycarpis manami gongaycushcächu willapämashayquicunata cumliytaga.

⁸⁸Cuyacoj cashayquimanno masta cawachimay ari. Chaura estatutuyquicunatapis cumlishämi.

⁸⁹TAYTA DIOS, palabrayquega mana gongacajmi. Syëluno mana ushacajmi caycan.

⁹⁰Aunishayquitaga imaycamapis cumlinquimi. Gammi tacyachishcanqui cay pachata. Chaymi mana cuyucunchu.

⁹¹Ima-aycapis gam nishayquinöllami caycan. Chaycunaga llapanpis gampa munaynillayquichömi caycan.

⁹²Yachachicuyniqui mana cushicachimaptenga llaquicuycällarmi wañöman caran.

⁹³Manami imaypis gongashäpächu willapämashayquicunataga. Chaycunami cawaycächiman.

⁹⁴Salbaycamay ari. Nogaga gampami cä. Willapämashayquicunataga cumliycämi.

⁹⁵Fiyucunaga shuyarpaycäman imay örapis wañuchimänallanpämi. Nogami ichanga estatutuyquicuna nishallanta cumliycä.

⁹⁶Nogaga llapantapis ricashcä ushacajllatami. Mandamintuyquicunami ichanga imaypis mana ushacanchu.

⁹⁷Nogapäga fiyupa allimi yachachicuyniquicuna. Imay örapis chaytaga yarparaycämi.

⁹⁸Mandamintuyquicunataga imaypis yarparaycämi. Chaycunami nogataga chiquimajcunapitapis mas yachaj cayman churamasha.

⁹⁹Yachachimajcunapitapis masmi tantiyä. Chaynöga tantiyä estatutuyquicunata yarpararmi.

¹⁰⁰Yachajcunapitapis masmi tantiyä. Chaynöga caycä willapämashayquicunata yarpararmi.

¹⁰¹Mana alli ruraycunataga manami ruränachu palabrayquita wiyacunäpaj.

¹⁰²Alli arriglar jusgashayquicunataga manami gongashcächu. Chaynöga caycä gam yachachimaptiquimi.

¹⁰³Shimëchöga mil-abëjapa mishquinpitapis masmi mishquëman palabrayquega.

¹⁰⁴Willapämashayquicunata wiyacurmi yarpaysapayashcä. Chaymi fiyupa chiquë llutan ruraycunataga.

¹⁰⁵Palabrayquega juc achquinömi. Purinäpaj caminupa achquipämajnömi caycan.

¹⁰⁶Cumlinäpaj jurashätaga cumlishämi: Allita ruranäpaj nimashayquitaga simri cumlishämi.

¹⁰⁷TAYTA DIOS, fiyupami llaquicuycä. Palabrayqui nishanno cawachimay ari.

¹⁰⁸Gamta mañacamushäta aunimay TAYTA DIOS. Alli arriglar jusgashayquita musyaycachimay ari.

¹⁰⁹Wañuchimaytami munarcaycan. Chaypis yachachimashayquitaga manami gongächu.

¹¹⁰Fiyucuna mana alliman chayachimayta munaptinpis willapämashayquitami nogaga wiyacö.

¹¹¹Estatutuyquitami erensyatano chasquicushcä. Chaymi nogataga cushicachiman.

¹¹²Layniquicunata llapan shongöpa yachacuytami munä. Imaycamapis wiyacuytami munä.

¹¹³Ishcay cära runacunataga manami ricaytapis munallächu. Yachachicuyniquitami ichanga cuyä.

¹¹⁴Gammi canqui washämaj, chapämaj. Gampa palabrayquimanmi yäracö.

¹¹⁵¡Mana allita rurajcuna ñaupäpita witicuy! Nogaga Diosnëpa mandamintuntami cumlishaj.

¹¹⁶Aunimashayquino yanapämay. Chauraga masta cawashämi. Gamman yäracaycämuptëga ama mana alliman chayachimaychu.

¹¹⁷Salbaycamay ari. Chauraga cawashärämi. Layniquitapis cumlishämi.

¹¹⁸Layniquita cachaycojtaga gam disprisyanquimi. Chaura chay runacunaga quiquillanmi llutanman chayan.

¹¹⁹Cay pachacho caj fiyucunataga ganratanömi ricanqui. Chaymi nogaga estatutuyquicunata fiyupa cuyä.

¹²⁰Gamta manchacur nogaga sicsicyaycä. Imanöpis jusganayquipaj cashayquipitami fiyupa llaquicö.

¹²¹Imaypis allillatami rurashcä. Ñacachimajcunapa maquinmanga ama cachaycamaychu.

¹²²Noga allilla goyänäpaj yanapaycamay ari. Fiyucunaga ama ñacachimächunchu ari.

¹²³Ñawëpis chulluycan salbamänayquipaj ricchacur shuyaraycaptillämi, aunimashayquita cumlimänayquipaj shuyaraycaptillämi.

¹²⁴Yanapaycamay ari cuyacoj cashayquimanno. Layniquicunata yachachimay.

¹²⁵Nogaga sirbishojniquimi cä. Tantiyaycachimay. Nogaga estatutuyquicunata yachacuytami munä.

¹²⁶TAYTA DIOS jusganayquipaj caj diya chayamushanami. Mana wiyacojcunaga yachachicuyniquita manami cumlishachu.

¹²⁷Nogami ichanga allinnin goripitapis masraj mandamintuyquicunata cuyä.

¹²⁸Chaymi nogaga willapämashayquino goyä. Llutan ruraycunataga llapantami chiquë.

¹²⁹Estatutuyquicunaga fiyupa allimi. Chaymi nogaga wiyacö.

¹³⁰Palabrayquiwan tantiyachiptenga mana yachaj runapis allimi tantiyan.

¹³¹Amatarmi munä mandamintuyquicunata masta yachacuyta.

¹³²Tayta Dios, rispitashojcunataga allimi ricanqui. Chayno nogatapis cuyapämashpayqui alli ricaycamay ari.

¹³³Aunimashayquino yanapämay ari. Ama camacächiychu noga mana allita ruranätaga.

¹³⁴Runacuna ñacachimänanpita salbaycamay. Nogaga willapämashayquicunata cumliytami munä.

¹³⁵Nogataga alli ñawiquiwan ricaycamay ari. Layniquicunatapis yachachimay.

¹³⁶Yachachishayquicunata mana cumliptinmi nogaga fiyupa wagä.

¹³⁷TAYTA DIOS, gamga juchaynajmi canqui. Rasun cajtami llapantapis jusganqui.

¹³⁸Estatutuyquicunaga llapanpis allimi, rasun cajllami.

¹³⁹Nogaga fiyupami rabyä. Chiquimajcuna palabrayqui nishanno mana cumliptinmi rabyä.

¹⁴⁰Gam aunishayquega rasun cajmi. Chaymi aunishayquipita nogaga fiyupa cushicö.

¹⁴¹Nogaga umildimi cä. Pï-maypis manacajman churaman. Chaypis manami gongächu willapämashayquicunataga.

¹⁴²Gamga llapantapis allimi jusganqui. Yachachishayquipis rasun cajmi.

¹⁴³Fiyupa llaquicurmi imata ruraytapis mana camäpacurächu. Mandamintuyquicunami ichanga cushicachimasha.

¹⁴⁴Estatutuyquicunaga allimi. Sumaj tantiyaycachimay, allilla cawaycachimay ari.

¹⁴⁵TAYTA DIOS, llapan shongöpami mañacamö. Wiyaycamay ari. Llapan layniquicunatami cumliyta munä.

¹⁴⁶Gamtami mañacamö. Yanapämay ari estatutuyquita cumlinäpaj.

¹⁴⁷Manaräpis pacha waraptin jatarcur mañacamö yanapämänayquipaj. Nogaga palabrayquimanmi yäracö.

¹⁴⁸Waray-waraymi ricchä aunishayquicunata yachacur.

¹⁴⁹TAYTA DIOS, gamga cuyapäcojmi canqui. Yanapaycamay ari. Alli cashayquimanno cawachimay.

¹⁵⁰Fiyupa chiquimajcunaga gaticachämar taripaycämannami. Yachachicuyniquicunatami ichanga gongaycush.

¹⁵¹TAYTA DIOS, gamga ñaupallächömi caycanqui. Mandamintuyquega llapanpis rasun cajllami.

¹⁵²Unaypita-pachanami musyä estatutuyquicunataga. Chaytaga quiquiquimi camacächishcanqui imay-yajpis cananpaj.

¹⁵³Llaquicuycajtaga salbamay ari. Yachachicuyniquitaga manami gongashcächu.

¹⁵⁴Faburnë jatarishpayqui jorgamay. Aunimashayquita cumlir shacyächimay ari.

¹⁵⁵Layniquicunata mana wiyacuptin fiyucunataga manami salbanquichu.

¹⁵⁶TAYTA DIOS, gamga fiyupami cuyapäcunqui. Alli arriglaj cashayquimanno cawachimay ari.

¹⁵⁷Ñacachimajcuna chiquimajcunaga achcajmi caycan. Chaypis nogaga manami gongaycöchu estatutuyquicunataga.

¹⁵⁸Juchasapacunata ricashpä pasaypami melanäcö. Chay runacunaga palabrayquita manami wiyacunchu.

¹⁵⁹TAYTA DIOS fiyupami cuyä mandamintuyquicunataga. Cuyacoj cashayquimanno cawachimay ari.

¹⁶⁰Palabrayquega llapanpis rasun cajllami. Alli arriglaj cashayquega imaypis manami rucangachu.

¹⁶¹Mana rimapaycaptë munayniyoj runacuna gaticachämajtaga manami manchacöchu. Gampa palabrayquitami ichanga manchacö.

¹⁶²Aunimashayquiman yäracurmi cushisha caycä. Pamparaycaj guellayta tariycojnörämi cushisha caycä.

¹⁶³Llullacuytaga fiyupami pengacö. Yachachicuyniquitaga amatarmi cuyä.

¹⁶⁴Alli arriglaj captiquimi imay örapis gamta alabaycä.

¹⁶⁵Yachachicuyniquita cumlejcunaga cushishami goyan. Paycunataga imapis manami juchaman tunichinchu.

¹⁶⁶TAYTA DIOS, nogaga mandamintuyqui niycashanno llapantami cumlishcä. Salbamänayquitami munaycä.

¹⁶⁷Nogaga estatutuyquita wiyacömi. Llapan shongöpami cuyä.

¹⁶⁸Nogaga willapämashayquitami estatutuyquitami wiyacö. Gam musyanquimi imano goyashätapis.

¹⁶⁹TAYTA DIOS, ruwacur mañacamushätaga wiyaycamay. Palabrayquicho caycashanno tantiyaycachimay.

¹⁷⁰Mañacaycämushätaga wiyaycamuy ari. Aunimashayquino salbaycamay.

¹⁷¹Alabansacunawanmi alabashayqui. Gammi yachachimashcanqui layniquicunata.

¹⁷²Aunimashayquipitami alabashayqui. Mandamintuyquicunaga llapanpis allillami.

¹⁷³Gamga yanapämänayquipaj listulla caycay. Willapämashayquicunata nogaga llapantami cumliycä.

¹⁷⁴TAYTA DIOS, salbaycamay ari. Nogaga yachachimashayquita wiyarmi cushicö.

¹⁷⁵Alabanäpämi cawayta munä. Alli arriglaj cashpayqui yanapaycamay.

¹⁷⁶Nogaga uyshanömi pantacäcushcä. Ashimaj shaycamuy ari. Nogaga manami gongashcächu mandamintuyquicunata.