Read Tayta Diosninchi Isquirbichishan Salmos 139 Bible Online

Salmos 139 - Tayta Diosninchi Isquirbichishan bible

Salmos 139

¹David isquirbishan alabansa. TAYTA DIOS, gamga imano cashallätapis ricamashcanquimi. Imano cashallätapis musyanquimi.

²Gamga musyanquimi imano cawashallätapis. Carucho caycashpayquipis musyaycanquimi imallata yarpaycashätapis.

³Maycho goyashäta maycho purishallätapis ricaycämanquimi. Ima rurashallätapis musyaycanquimi.

⁴Imata rimanäpaj mana tariptëpis TAYTA DIOS gamga maynami musyaycanqui imata rimarcunätapis.

⁵Gamga llapanpitami ricaycämanqui. Maquiquiwanmi chapaycämanqui.

⁶Chayno nogapaj musyashayquega fiyupa almiraypämi. Chaycunataga manami tantiyaytapis atipächu.

⁷¿Mayllamanga aywacömanchuraj espirituyquipita? ¿Mayllamanga gueshpëmanchuraj gampita?

⁸Syëluman aywacuptëpis chaychömi gam caycanqui. Cay pacha rurinman yaycuptëpis chaychöpis gamga caycanquimi.

⁹Inti yagamunan caj-läpa pärir aywacuptëpis jana lamar cantuncho tiyacuycuptëpis

¹⁰maquiquega aypämunmanmi chaymanpis. Derëchu caj maquiquega manami cachaycamanmanchu.

¹¹Gampita pacacuyta yarpaptë, u achicyaycaj pacha chacayman ticracuriptinpis

¹²chacayga gampita manami pacamanmanchu. Chacaypis gampäga caycan junajno achicyajllami. Gampäga chacaypis junajpis iwal-llami.

¹³Tayta Dios gammi llapan cuerpötapis rurashcanqui. Mamäpa pachanchöpis gammi formamashcanqui.

¹⁴Fiyupa almiraypäta ruramashayquipitami gamta alabä. Gam rurashayquicunaga almiraypämi. Chayno almiraypaj cashantaga rasunpami riguë.

¹⁵Noga ruracaycashätaga pipis manami ricaranchu. Pipis manami musyaranchu imano ruracaycashätapis. Pacha rurinchönöpis mana ricacayllami camacächimashcanqui.

¹⁶Gamga ricaycämarayquimi mamäpa pachancho aychallaraj wiñaycashäta. Chaycunaga llapanmi libruyquicho isquirbiraycan. Manaräpis yuriptë gamga mayna musyarayqui imay-yaj cawanäpaj cashätapis.

¹⁷Tayta Dios, gam yarpashayquega almiraypämi. Chay yarpashayquicuna aypalla cashanga mana atipaypämi.

¹⁸Yarpashayquicunata yupayta munaptëga agushpitapis mas aypallami caycan. Manami imaypis yupayta atipämanchu.

¹⁹Tayta Dios, fiyucunataga wañurachiy. Ñaupäpita garguy wañuchicojcunata.

²⁰Paycunaga gampa contrayquimi riman. Manacajllapitami gampa contrayqui jatarin.

²¹TAYTA DIOS, gamga musyaycanquimi gamta chiquishojcunata noga chiquishäta. ¿Manachu manacajman churä manacajman churashojcunatapis?

²²Nogaga fiyupami paycunata chiquë. Conträcunatanömi ricäpis.

²³Tayta Dios, imano cashätapis ricamay. Imano shongö cashallantapis musyaycamay ari. Imano yarpashallätapis musyamay ari.

²⁴Rurashäcuna mana alli captenga tantiyachimay ari. Nircur yachachimay gam munashayquino cawanäpaj.