Read Tayta Diosninchi Isquirbichishan Salmos 145 Bible Online

Salmos 145 - Tayta Diosninchi Isquirbichishan bible

Salmos 145

¹David isquirbishan alabansa. Gam fiyupa munayniyoj Raynë cashayquitami willacushaj Tayta Dios. Imaycamapis alabaycäshayquimi.

²Waran waranmi alabashayqui. Imaycamapis alabaycäshayquimi.

³TAYTA DIOSGA fiyupa munayniyojmi. Chaymi alabananchi camacan. Pay munayniyoj cashanga tantiyaytapis mana atipaypämi.

⁴Tayta Dios gam rurashayquicunapämi taytancunapis wamrancunata willapanga. Munayniquiwan rurashayquicunatapis willaconga.

⁵Munayniyoj achicyaypa achicyaj cashayquita willaconga. Nogapis willacushaj fiyupa almiraypajcunata rurashayquicunata.

⁶Munayniyoj cashpayqui fiyupa manchariypajcunata rurashayquicunatami parlanga. Noganami willacushaj munayniyoj cashayquita.

⁷Fiyupa alli cashayquitami parlanga. Allita rurashayquipitanami cushicur cantanga.

⁸TAYTA DIOSGA fiyupa alli, cuyapäcojmi. Payga juclla manami rabyacunchu. Payga fiyupa cuyacojmi.

⁹TAYTA DIOSGA pï-maypäpis allimi. Ima rurashancunatapis cuyarmi rican.

¹⁰TAYTA DIOS, llapan rurashayquicuna alabaycushunqui. Wiyacushojcuna aduraycushunqui ari.

¹¹Paycunaga sumaj mandashayquipämi parlanga. Munayniyoj cashpayqui rurashayquicunatapis willaconga.

¹²Munayniyoj cashayquita, fiyupa achicyaypa-achicyaycaj munayniqui cashantapis runacunata musyachenga.

¹³Gam mandashayquega mana ushacajmi. Mandashayquega imaycamapis maquillayquichömi canga.

¹⁴TAYTA DIOSGA tunejcunata charinmi. Ñacaycajcunatanami alliman churan.

¹⁵Tayta Dios, llapanpis gamtami shuyarpaycäshunqui yargashan öra micuyta tarichinayquipaj.

¹⁶Chaura gamga alli cashpayquimi sacsananyaj tarichinqui llapan cawajcunata.

¹⁷TAYTA DIOSGA llapan aunishantapis cumlinmi. Llapan rurashancunatapis cuyapanmi.

¹⁸TAYTA DIOSGA llapan shongunpa mañacojcunata yanapanmi.

¹⁹Payta rispitajcuna imatapis mañacushantaga llapantami camacächin. Mañacuptin imapitapis salbanmi.

²⁰TAYTA DIOS imapitapis chapanmi payta rispitajcunataga. Fiyu runacunatami ichanga usharin.

²¹Nogaga TAYTA DIOSLLATAMI alabashaj. Juchaynaj TAYTA DIOSTA llapan adurachun cananpis imaycamapis.