Read Tayta Diosninchi Isquirbichishan Salmos 147 Bible Online

Salmos 147 - Tayta Diosninchi Isquirbichishan bible

Salmos 147

¹¡Aleluya! ¡TAYTA DIOSGA alabasha cachun! Fiyupa allimi Tayta Diosninchïta alabansacunawan alabayga. Paytaga cushisha mishquilla alabaypaj.

²TAYTA DIOSGA Jerusalentapis allchaycächinmi. Israelcuna mashtacasha caycajcunatapis shuntaycämunmi.

³Paymi allchacächin llaquicuycajcunatapis. Guerincunatapis räpuwan watapan.

⁴Payga musyanmi ayca goyllarcuna cashantapis. Cada goyllarcunapa jutintapis yachanmi.

⁵Tayta Diosninchëga fiyupa munayniyojmi. Paypa yarpaynenga mana atipaypämi.

⁶TAYTA DIOSGA yanapanmi umildicunata. Fiyu runacunatanami ichanga pengayman churan.

⁷Agradësicushpayqui TAYTA DIOSTA alabansacunawan alabay. Tayta Diosta alabay arpallanpawan.

⁸Paymi syëlupapis pucutarächin. Cay pachaman tamyamunanpäpis tamyata camarin. Guewata wiñachin jircacunacho.

⁹Animalcuna micuyta tarinanpäpis camacächin. Äbicunapa wawan yargar wagaptinpis micuyta tarichin.

¹⁰Tayta Diosga manami cushicunchu cawallu fiyupa firsayoj captinpis, ni runa callpasapa captinpis.

¹¹Chaypa ruquin TAYTA DIOSGA cushicun payta rispitaptinmi, pay cuyacoj cashanman yäracuptinmi.

¹²Jerusalén, TAYTA DIOSTA alabay. Sión, Diosniquita alabay.

¹³Paymi puncuyquicunapa rancancunatapis sinchiyächisha. Siudächo tiyaj runacunatapis bindisyunta gosha.

¹⁴Paymi alli goyächin nasyunniquicho tiyajcunata. Rïgu alli wayunanpäpis bindisyunta churan.

¹⁵Tayta Diosmi nin cay pachacho ima imano cananpäpis. Chay nishanga jinan örami cumlin.

¹⁶Tayta Diosmi cay pachaman rashtachimun utcuta-jina. Gasapatapis mashtachimun yuraj cachita-jina.

¹⁷Tayta Diosmi runtu tamyatapis gasapatano shicwachimun. Pay gasächiptinmi yacupis tinticäcun.

¹⁸Ichanga chullucäcunanpaj Tayta Dios niptin chullucäcun. Wayrächimuptin yacupis cörrin.

¹⁹Israel jutiyoj Jacobtapis Paymi musyachiran yarpashancunata, laynincunata, mandamintuncunata.

²⁰Waquin nasyuncunataga manami chayno rurashachu. Waquin nasyun runacunaga Tayta Diospa laynincunata manami imaypis musyashachu. ¡Aleluya! ¡TAYTA DIOSGA alabasha cachun!