Read Tayta Diosninchi Isquirbichishan Salmos 17 Bible Online

Salmos 17 - Tayta Diosninchi Isquirbichishan bible

Salmos 17

¹David mañacushan. TAYTA DIOS, wiyaycamay ari. Chaynöpami musyanquipaj juchaynaj cashäta. Sumaj wiyaycamay mañacamushäta. Nogaga manami llullacurchu mañacamö.

²Gamga musyanquimi juchaynaj cashäta. ¡Jitapämajcunapitaga salbaycamay ari!

³Gam musyaycanquimi imata yarpashallätapis. Chacaypami shamushcanqui musyapämänayquipaj. Juchäta ashirpis manami tarishcanquichu. Imatapis manami rimashcächu mana cumbënejtaga

⁴waquin rimashannöga. Mandamintuyquicuna nishallantami cumliycä. Mana allitaga manami rurashcächu.

⁵Nogaga gampa caminullayquipami purishcä. Gampa caminuyquipita juc-läpaga manami llojshishcächu.

⁶Tayta Dios, gammanmi gayacamö imaypis mañacamuptë wiyamashayquita musyar. Ruwacushäta wiyar yanapaycamay ari.

⁷Nogaga musyämi gamman yäracamojcunata chiquejcunapa munayninpita salbanayquipaj munayniyoj cashayquita. Cuyapäcoj cashayquita sumaj musyaycachimay ari.

⁸Ñawi-ñïñuyquitanöpis cuydaycamay. Älayqui rurinman pacaycamay

⁹fiyu runacunapita, wañuchimänanpaj chiquimajcuna tumaparcaycämajpita.

¹⁰Chiquimajcunaga quiquincuna munashallanpämi yarpachacurcaycan. Munayniyoj-tucushpan fiyu shiminpami parlarcaycanpis.

¹¹Imano caycashallätapis ricaparcaycäman illajpita wañurachimänanpäna.

¹²Paycunaga carcaycan micucoj liyuncuna uchcullanpita cäsaycajno. Illajpita yargasha charipäcunanpänömi caycan.

¹³¡TAYTA DIOS, yanapämayna ari! ¡Fiyu runacunataga ruwacachiy! Fiyu runacunapita salbaycamay sabliquiwan.

¹⁴Munayniquiwan chapaycamay ari. Chay runacunapaga cay pachacho cajcunallami canga. Paycunata cay pachapita illgaycachiy. Jina paycunaga rïcuyarpis rïcuyäcuchun ari. Wamrancunapis sacsashancama micunanpaj cachun. Willcancunapäpis puchuy-puchuy cachun.

¹⁵Nogami ichanga fiyupa cushicushäpaj juchaynaj car gamta ricar ñaupayquicho goyarna. Riccharcamur gampa ñaupayquicho ricacushpämi fiyupa cushicushaj.