Read Tayta Diosninchi Isquirbichishan Salmos 18 Bible Online

Salmos 18 - Tayta Diosninchi Isquirbichishan bible

Salmos 18

¹Saulpitawan llapan chiquejcunapita TAYTA DIOS salbaycuptin sirbejnin David cantashan alabansa. Alabar niran: TAYTA DIOS, gammi callpätapis gomashcanqui. ¡Nogaga gamta fiyupami cuyä!

²Gammi canqui washämaj, pacamaj, salbamaj, Diosnë, chapämaj gaga, chapacuna escüdö, munayniyoj salbamajnë, altunnin pacacunä.

³TAYTA DIOS, alabasha canayquimi camacan. Mañacamuptë chiquimajcunapitaga salbamanquimi.

⁴Wañuyga janächönami ricacuran. Juchuno janächöna captin fiyupa mancharirä.

⁵Wañuyga wascanömi pitucarcamaran. Wañunäpämi togllacunata churaran.

⁶Fiyupa llaquicurmi TAYTA DIOSTA mañacurä. Mañacurä yanapämänanpaj. Payga wiyamaran Templunpita. ¡Gaparayparaj mañacushäta wiyaran!

⁷Chaymi intërucho fiyupa timlur caran. Intëru jircacunapis fiyupa chucchuran. Tayta Dios rabyacurcuptinmi cuyuriran.

⁸Senganpita goshtay llojshiycaran, shiminpitana nina. Shiminpaga ajtuycämuran ratataycaj shanshata.

⁹Syëluta quicharirmi urämuran. ¡Chaquenga caycaran fiyupa yana pucutay janancho!

¹⁰Querubín anjilta muntacurcur aywacuran. Wayrawanmi aywacuran.

¹¹Pacacunanmi caran yanauyaycaj chacay, fiyupa chacaj yana pucutay.

¹²Fiyupa achicyaycaj illguymi ñaupanpita llojshiran. Pucutaypitana tamyamuran runtu tamyawan ratataycaj shansha.

¹³Janaj pachacho caycaj TAYTA DIOSMI runtu tamyatawan ratataycaj shanshata tamyachimuran. Räyuno busninwan parlamuran.

¹⁴Lëchata jitajnöraj räyuchimusha. Chaura chiquimajcunataga machiypa-machir gueshpichiran.

¹⁵TAYTA DIOS piñacur, sinchipa pücariptin lamar rurin alayri ricacäcuran. Munduta tucnarajcunapis alayri ricacaran.

¹⁶Tayta Diosga janajpita-pachami ayparcamusha. Maquinwan jorgamasha jatun lamarpita.

¹⁷Fiyupa munayniyoj chiquimajcunawan pillyaycaptëpis salbamashami. Paycunaga caran nogapita mas callpayojmi.

¹⁸Ñacaycho caycaptëmi, conträcuna magaycämaptinmi TAYTA DIOSGA yanapämaran.

¹⁹Paymi allicho jorgamaran. Cuyamashpanmi salbamaran.

²⁰Allillata rurashäpitami TAYTA DIOSGA alli päguta gomasha.

²¹Nogaga TAYTA DIOSPA nänillanpami purishcä. Juchata mana ruraypa llapantapis yachachimashallantami rurashcä.

²²Mandamintuncuna nishantaga llapantami ruraycä. Laynincunataga imaypis cumliycämi.

²³Paypa ñaupanchöga alli cajllatami llapantapis ruraycä. Jucha ruraypitaga witicushcämi.

²⁴Allillata rurashäpitami TAYTA DIOSGA alli päguta gomasha.

²⁵Tayta Dios, cuyapäcoj cajtaga gampis yanapanquimi. Alli cajcunatapis yanapanquimi.

²⁶Juchaynajcunatapis yanapanquimi. Fiyu cajcunatami ichanga castiganqui.

²⁷Umildicunataga salbanquimi. Alli-tucojcunatami ichanga manacajman churanqui.

²⁸TAYTA DIOS, gammi achicyaj pachata ricaycächimanqui. Chacaj pachaman chayanätapis gammi cawaycächimanqui.

²⁹Gam yanapämaptiquimi chiquimajcunaman magaj yaycushaj. Siudänincunapa curralnin jananpapis yaycurishaj.

³⁰Tayta Dios nishanga llapanpis allimi. TAYTA DIOSGA aunishanta llapantapis cumlinmi. Diosga payman yäracojcunata washanmi.

³¹TAYTA DIOSPITA mas jucga manami pipis canchu. Paynöga manami pipis washämashwanchu.

³²Tayta Diosmi jinyuyächiman. Ima rurashäcunachöpis alli llojshichiman.

³³Paymi chaquïtapis bïbuyächin lluychupatanöraj. Paymi altu jircacunachöpis mana manchacuypa goyächiman.

³⁴Paymi pillyapäpis yachachiman. Paymi callpata goman runsipita lëchata chutar illapanäpäpis.

³⁵Gammi chapaycämanqui, salbaycämanqui. Munayniquiwan yachacaycächimanqui. Cuyapäcoj cayniquiwanmi alliman churamashcanqui.

³⁶Gammi alli nänipa pushamashcanqui. Chaymi mana llushcacashcächu.

³⁷Chiquimajcunata gaticacharpis taripashcämi. Llapanta ushaycur-rämi cutimushcä.

³⁸Binsiptëga ñaupämanmi tuniran. Nircur mananami jatarishanachu.

³⁹Pillyachöpis gammi callpäta yurichishcanqui. Camacächishcanqui fiyucunapis rispitamänanpaj,

⁴⁰chiquimajcunapis nogapita gueshpir aywacunanpaj. Chaynöpami chiquimajcunataga illgächishcä.

⁴¹Paycuna «yanapämay» nir ruwacuptinpis manami pipis yanapashachu. TAYTA DIOSTA mañacuptinpis manami wiyashachu.

⁴²Munashäta rurashcä wayra ñuchu allpata apashanno cashancamami. Cällicunacho mitutanömi lluchcarpis ushashcä.

⁴³Runacuna conträ jatariptinpis salbamashcanqui. Nasyuncunapa mandajnin canäpämi churamashcanqui. Cananga jäpa runacunami sirbiycämanpis.

⁴⁴Chay runacunaga llapantami nishätapis wiyacun. Jäpa runacunapis rispitamanmi.

⁴⁵Juc-lä nasyun runacunapis manchacamanmi. Pacaraycashanpitapis sicsicyaycarmi llojshimun.

⁴⁶¡Alabasha cachun TAYTA DIOS! ¡Alabasha cachun chapämajnëga! ¡Fiyupa rispitasha cachun salbamaj Tayta Diosnëga!

⁴⁷Mana allita ruramashanpitami Tayta Diosnëga ayñita cutichisha. Llapan runacunatapis munaynillämanmi churamusha.

⁴⁸Chiquimajcuna fiyupa rabyasha caycajpita, mana wiyacojcuna nogapa conträ jatariptinpis Paymi salbaman. ¡Tayta Dios gammi salbamanqui fiyu runacunapita!

⁴⁹Chaymi llapan nasyuncuna wiyaycaptin alabashayqui. Cantaypapis alabashayquimi.

⁵⁰Sumaj allicho cananpämi yanapaycanqui acrashayqui raytaga. Imaypis allimi ricanqui Davidta, paypita mirar aywajcunatapis.