Read Tayta Diosninchi Isquirbichishan Salmos 19 Bible Online

Salmos 19 - Tayta Diosninchi Isquirbichishan bible

Salmos 19

¹David isquirbishan alabansa. Tayta Dios munayniyoj cashanta syëlumi willamanchi. Cay pachapis «Tayta Dios ruramasha» ninmi.

²Diyapis waran-waranmi musyachimanchi. Pagaspis waran-waranmi tantiyachimanchi.

³Imata mana niptin ni mana wiyacaptinpis,

⁴busnenga cay pachaman intërumanmi chayasha. Rimashancunaga may-chaymanpis aywashami. Tayta Diosga intipäpis juc pachatami syëlucho rurasha.

⁵Chaypitami llojshimun chayraj majachacasha mösuno. Aywayta gallaycurna cörrej runa cushisha cörriyta gallaycojno aywan.

⁶Intiga syëlupa jucaj cuchunpa yagamur jucaj cuchunpana yagan. Shanaynenga llapanmanmi chayan.

⁷TAYTA DIOSPA mandamintonga llapanpis allillami. Alli cawaytami tarichimanchi. TAYTA DIOS nishanga llapanpis cumlicanmi. Umildicunataga llapantami tantiyachimanchi.

⁸TAYTA DIOSPA laynincunaga manami llutanchu. Shongunchïtapis cushicachinmi. TAYTA DIOS yachachimashanchëga sumaj allimi. Yachachimanchi alli cawayta tarinapämi.

⁹TAYTA DIOSPA palabrantaga rispitaypämi. Palabranga manami imaypis rucacanchu. TAYTA DIOS jusgashancunaga rasun cajmi. Llapanpis allillami.

¹⁰¡Diospa palabranga lijïtimu goripitapis mas allimi! ¡Abëjapa mishquinpitapis mas mishquejmi!

¹¹Mandamintuyquicunaga yachachimanmi. Cumlejcunaga alli cawaytami tarenga.

¹²¿Piräshi tantiyacunman juchata rurashantaga? ¡Perdunaycamay ari Tayta Dios mana musyaynëpa juchata rurashäcunata!

¹³Musyaycar juchata ruranäpitaga chapaycamay ari. Ama cachaycamaychu shongö munashanta ruranäpäga. Chayrämi cashaj allita ruraj runa. Chauraga manami fiyupa juchayoj cashächu.

¹⁴TAYTA DIOS gammi chapämanqui, imapitapis salbamanqui. Cay parlashätaga yarpashäcunataga chasquiycamay ari.