Read Tayta Diosninchi Isquirbichishan Salmos 22 Bible Online

Salmos 22 - Tayta Diosninchi Isquirbichishan bible

Salmos 22

¹David isquirbishan alabansa. Diosnillä, Diosnillä, ¿imanirtaj cachaycamashcanqui? ¿Imanirtaj mana salbamanquichu? ¿Imanirtaj mana wiyamanquichu llaquicur mañacaycämushäta?

²Tayta Diosnillä, goyay-goyay mañacamuptëpis manami yanapämanquichu. Pagaspapis manami jamaytapis tarënachu.

³Ichanga gam Santo Diosmi canqui. Tiyaycashayquichöga Israelcunami alabaycäshunqui.

⁴Unay papänëcunaga gammanmi yäracamuran. Yäracamuptinmi imapitapis salbarayqui.

⁵Yanapänayquipaj mañacushuptiqui salbarayqui. Gamman yäracamoj cäga manami pengaycho cangachu.

⁶Nogaga cä curunöllami. Runacuna asipänanmi cä.

⁷Ricamajcunaga asipämar manacajman churaman. Umantapis jajtachirmi nin:

⁸«Payga TAYTA DIOSLLAMANMI yäracoj. Rasunpa cuyashpanga mä TAYTA DIOS shamuchun ari salbananpaj» nir.

⁹Chayno captinpis gammi mamäpa pachanpita yurichimashcanqui. Mellgayninchöpis wiñachimashcanqui.

¹⁰Manaräpis yuriptëmi gamga ricaycämarayqui. Mamäpa pachancho cashäpita-pachami gamga Diosnë caycanqui.

¹¹Ama cachaycamaychu. Llaquicuynami nogamanga chayaycämun. Pipis manami canchu yanapämaj.

¹²Chiquimajcunaga wishtacoj törucunano tumaparcaycäman. Chaycunaga carcaycan Basancho tiyaj callpasapa törucunanömi.

¹³Micucoj liyuncunanöraj gaparpanpis. Jatunta äyacarcärirmi nogaman cörrimun.

¹⁴Yacu jicharishanönami caycäpis. Tullöcunapis pasaypa gotucäcushanami. Shongöpis ushaycanna.

¹⁵Shimëpis chaquicäcushami. Gallöpis watacäcushami. Wañushata-japuyna jitaraycajta cachaycamashcanqui.

¹⁶Cañicoj allgucunanömi fiyucunaga intëröpa curalacaycamasha. Maquëta chaquëtapis uchcurisha.

¹⁷Pasaypa tullullannami caycä. Chiquimajcunaga cushipämashpan mana cachaycuypami ricapaycäman.

¹⁸Röpäta raquipänacusha. Röpäta mayganpis apacunanpaj surtita jitasha.

¹⁹TAYTA DIOS ichanga gammi yanapämanqui. ¡Ama cachaycamaychu! ¡Yanapaycamay ari!

²⁰Sabliwan wañuchimänanpita salbaycamay. Ama camacächiychu chay allgucuna wañuchimänantaga.

²¹Chay liyuncunapita salbaycamay. Chay fiyu törucunapita gueshpiycachimay.

²²Gampämi runa-masïcunata willapäshaj. Shuntacashancunachömi alabashayqui.

²³¡Rispitar adurajcunaga TAYTA DIOSTA alabay! ¡Jacobpita mirar aywajcuna TAYTA DIOSTA alabay! ¡Israelpita mirar aywajcuna TAYTA DIOSTA aduray!

²⁴Payga manami gongaycunchu pobricuna ñacashanta. Manacajmanpis manami churanchu pobricuna ñacaycajta. Manami pacacunpischu. Mañacuptenga yanapanmi.

²⁵Adurashunayquipaj shuntacashan runacunapa ñaupanchömi alli cashayquipita alabashayqui. Gamta rispitashojcunapa ñaupanchömi llapan aunishäta cumlishayqui.

²⁶Umildicunaga sacsananyajmi miconga. Sirbiyta munaycajcunaga TAYTA DIOSTA alabanga. Chaura para-simrimi cawangapaj.

²⁷Tucuy casta carpis, may nasyunpita carpis TAYTA DIOSMANNA yäraconga. Cay pachacho tiyajcunaga llapan runacunami TAYTA DIOSTA adurananpaj shamonga.

²⁸TAYTA DIOSMI Rayga. Paymi llapan nasyuncunatapis mandan.

²⁹Pipis bïdantaga manami rantishachu. Chaymi munayniyojcunaga rispitar umpur Tayta Diosllata cay pachacho aduranga.

³⁰Nogapita mirar aywajcunaga Tayta Diosllatami aduranga. Payllapämi imaycamapis willaconga.

³¹Guepata yurejcunatapis willapanga Tayta Dios alli cashanta, imata rurashantapis.