Read Tayta Diosninchi Isquirbichishan Salmos 27 Bible Online

Salmos 27 - Tayta Diosninchi Isquirbichishan bible

Salmos 27

¹David isquirbishan alabansa. TAYTA DIOSMI achquipämaj, salbamaj caycan. ¿Pitaraj manchacöman? TAYTA DIOSMI imapitapis chapäman. ¿Imataraj manchacöman?

²Fiyucunawan chiquimajcunaga shuntacan magamar illgächimänanpaj. Chaypis quiquincunami llutanman tunir mana alliman chayan.

³Aypalla suldärucuna juntapaycamaptinpis manami manchacöchu. Guërra captin magamänanpaj yaycamuptinpis Tayta Diosllamanmi yäracuycäshaj.

⁴TAYTA DIOSTAGA jucnayllapämi mañacushcä. Jucnayllatami munäpis. TAYTA DIOS caycashancho para-simri goyayllatami munä chaycho aduranäpaj, cuyayllapaj caycajta ricanäpaj.

⁵Mana allicuna chayamuptin Tayta Diosmi Wasincho pacamanga. Chaychömi washämanga. Gaga jananman churamarmi gueshpichimanga.

⁶Yanapämanga chiquimajcunata binsinäpaj. Chaura nogaga Wasincho uywata pishtarcur rupachishaj. Cushicuywan alabansacunata paypaj cantashaj.

⁷Gamtami mañacö TAYTA DIOS. Wiyaycamay ari. Nogata cuyapaycamay. Yanapaycamay ari.

⁸Shongömi shacyächiman «TAYTA DIOSMAN yäracuy» nir. Chaymi nogaga gamllaman yäracamö.

⁹Nogapita ama pacacuychu. Ama wasguipämaychu. Gamllami imachöpis yanapämanqui. Japallätaga ama cachaycamaychu ari. Gamllami canqui salbamaj Tayta Diosnëga.

¹⁰Taytä mamä cachaycamaptinpis gammi TAYTA DIOS nogataga uywacamanqui.

¹¹TAYTA DIOS, alli näniquita ricachimay. Chiquimajcuna ricapaycämaptin alli cajpa pushamay.

¹²Chiquimajcunapa maquinmanga ama cachaycamaychu. Paycunaga nogapa conträmi parlarcaycan. Manacajta jitaparmi rabyaparcaycäman.

¹³Chaypis alli cashpayquimi gamga yanapämanquipaj. Cay pachacho goyashäcamaga yanapämanquipämi.

¹⁴TAYTA DIOSMAN yäracuy. Mana guellanayllapa yäracuy. TAYTA DIOSLLAMAN yäracuy ari.