Read Tayta Diosninchi Isquirbichishan Salmos 32 Bible Online

Salmos 32 - Tayta Diosninchi Isquirbichishan bible

Salmos 32

¹David isquirbishan alabansa. Cushishami cawanga llapan juchanpita perdunasha caj runaga.

²Cushishami cawanga TAYTA DIOS mana jusgashan runaga, alli shongu runaga.

³Jucha rurashäta amuräcushäcamaga goyarpoj wagaycaptilläna cuerpöpis pasaypana gotucaycasha.

⁴Pagasta junajtapis castigamaptiquimi fiyupa ñacashcä. Usya wichan acaywan wayta wañuytaycajno caycashätanami mayashcä. Selah

⁵Chaymi sumaj yarpachacurir «Juchätaga llapanta TAYTA DIOSTA willapäshaj» nishcä. Nircurna mana alli rurashäcunataga mana pacaypa gamta willashcä Tayta Dios. Chauraga gamnami llapanta perdunamashcanqui. Selah

⁶Chaymi ñacaycho caycashan öra wiyacushojcunaga mañacamushunquipaj. Yacu manchariypaj chayashpanpis paycunamanga manami aypangachu.

⁷Gammi canqui pacacunä, mana allicunapitapis chapämajnëga. Salbamashayquipitami cushicur alabansacunatapis cantashaj. Selah

⁸Tayta Diosga caynömi nin: «Gamtaga manami gongashayquichu. Nogami tantiyachishayquipaj. Nogami willapäshayquipaj. Imano goyänayquipäpis yachachishayquipaj.

⁹Ama canquichu cawalluno bürruno mana tantiyacöga. Cawallutaga busalninwanrämi ichichinchi. Bürrutapis shengallawacurcur-rämi munashanchïpa apanchi. Chayno mana rurashaga manami wiyamanchïchu» nir.

¹⁰Fiyucunaga nanaywan fiyupami ñacanga. TAYTA DIOSMAN yäracojcunataga paymi fiyupa cuyashpan yanapanga.

¹¹TAYTA DIOSMAN yäracojcunaga cushicuy pay alli cashanpita. Cushicushpayqui alabansacunata cantay.