Read Tayta Diosninchi Isquirbichishan Salmos 33 Bible Online

Salmos 33 - Tayta Diosninchi Isquirbichishan bible

Salmos 33

¹Alli runacunaga TAYTA DIOSTA alabay. Alli shongucuna alabashanga cuyayllapämi.

²Arpallanpawan TAYTA DIOSTA agradësicuy. Chunca cuerdayoj arpata tucapallapa alabay.

³Mushoj alabansata cantay. Sumaj tucashpayqui alabay.

⁴TAYTA DIOS rimashanga llapanpis cumlinmi. Llapan rurashanmi musyachimanchi alli cashanta.

⁵TAYTA DIOSGA allita rurajtami, rasun cajta rurajtami cuyan. Payga cay pachacho cajta llapantami cuyan.

⁶TAYTA DIOS niptinmi syëlupis ruracaran. Mandarcuptillanmi yuriran intipis quillapis estrëllacunapis.

⁷Paymi shuntaran juc pachallaman aypalla lamar yacutapis.

⁸Llapaniqui cay pachacho cajcunaga TAYTA DIOSTA rispitay. Llapan runacuna cay pachacho cäga TAYTA DIOSTA manchapacuy.

⁹Paypa shimillanwanmi llapanpis ruracasha. Rimarcushallanpitami llapanpis casha.

¹⁰TAYTA DIOSMI mana camacächinchu payta mana rispitajcuna imata rurayta munaptinpis.

¹¹TAYTA DIOSMI ichanga rurayta yarpashanta ruran.

¹²TAYTA DIOSTA rispitaj nasyun runacunaga cushishami cawanga. Paycunataga Tayta Diosmi payllata sirbinanpaj acrasha.

¹³TAYTA DIOSGA syëlupita-pachami ricaycämun. Llapan runacunatami ricapaycan.

¹⁴Syëlupita-pachami ricaycämun cay pachacho cawajcunataga.

¹⁵Tayta Diosmi camasha runapa shonguntapis. Imata rurashallantapis ricapaycanmi.

¹⁶Manami pï raypis salbacunchu quiquinpa aypalla suldäruncunallawanga. Mana manchacoj jinyu runacunapis manami salbacunchu quiquinpa callpallanwanga.

¹⁷Cawallucunaga manami pitapis salbanmanchu. May-jina callpasapa carpis manami pitapis salbanmanchu.

¹⁸TAYTA DIOSGA manami cachaycunchu payta rispitajcunataga, payman yäracojcunatapis.

¹⁹Yäracojcunataga salban wañunanpita. Yargay muchuy captinpis imanöpis cawachinmi.

²⁰Noganchëga TAYTA DIOSMANMI yäracunchi. Paymi yanapämanchi, chapämanchi.

²¹Llapan shongunchïpa juchaynaj Tayta Diosmanmi yäracunchi. Chaymi shongunchïpis cushicun.

²²TAYTA DIOS, yäracamushä-tupu nogacunataga cuyapaycamay ari.