Read Tayta Diosninchi Isquirbichishan Salmos 34 Bible Online

Salmos 34 - Tayta Diosninchi Isquirbichishan bible

Salmos 34

¹Davidga Abimelecpa ñaupancho artita rurar löcu-tucuran. Chaymi Abimelec garguran. Chay wichan imanöpis päsashanpitami David isquirbiran cay alabansata. TAYTA DIOSTAGA imay örapis alabaycäshämi. Shimillächömi alabansacuna caycanga payta alabanäpäga.

²TAYTA DIOSPITAMI fiyupa cushisha caycä. Umildi runacunapis wiyashpayqui cushicuy.

³TAYTA DIOSTA nogawan iwal agradësicushun. Munayniyoj Tayta Diosta llapanchi alabashun.

⁴Ruwacuptë TAYTA DIOSGA wiyamashami. Chaynöpami salbamasha llapan manchacuycashäpitapis.

⁵Tayta Diosllaman ricarajcunaga cushishami carcaycan. Paycunaga imaypis manami pengaycho cangachu.

⁶Llaquicur gayacuptë TAYTA DIOSGA wiyamashami. Llapan llaquicuycunapitami jorgamasha.

⁷TAYTA DIOSPA anjilninmi salban chapan Tayta Diosta rispitajcunataga.

⁸TAYTA DIOS fiyupa alli cashanta musyanayquipaj masqui camay. Cushishami cawanga payman yäracojcunaga.

⁹TAYTA DIOSTA rispitay pay acrashan cajcunaga. Payta rispitajcunataga manami imapis pishengachu.

¹⁰Rïcucunapis pobriyar muchupacarga yarganmi. TAYTA DIOSMAN yäracojcunapaga manami ima-aycanpis pishengachu.

¹¹Wamräcuna, shamuy wiyamänayquipaj. TAYTA DIOSTA rispitaytami yachachishayqui.

¹²Gamga ¿unaycama cawaytachu munanqui? ¿Cushisha goyaytachu munanqui?

¹³Chauraga llutancunata ama rimaynachu, ama llullacuynachu.

¹⁴Mana allita ama ruraynachu. Allillatana ruray. Piwanpis allilla goyay.

¹⁵Alli runacunataga TAYTA DIOS allimi rican. Mañacushancunatapis wiyanmi.

¹⁶Mana allita rurajcunapami ichanga TAYTA DIOS contran caycan. Paycunataga ushajpämi cay pachapita illgächenga.

¹⁷Allillata ruraj runacunataga TAYTA DIOS yanapanmi. Ima llaquicuycho caycashanpitapis jorgunmi.

¹⁸Jucha rurashanpita llaquicuycajcunapa ñaupanchömi caycan TAYTA DIOSGA. Llaquicuycajcunatapis salbanmi.

¹⁹Allillata ruraj runacunataga imapis mana allicunarämi chayan. Chaycunapitaga llapanpitapis TAYTA DIOSMI salban.

²⁰Tayta Diosmi tulluncunatapis rican. Chaymi juc tullullanpis mana paquengachu.

²¹Fiyu runacunamanga quiquin mana allita rurashallanmi chayan. Allita ruraj runacunata chiquëga castigashami canga.

²²TAYTA DIOSGA salbanmi payman yäracojcunata. Manami castigangachu.