Read Tayta Diosninchi Isquirbichishan Salmos 35 Bible Online

Salmos 35 - Tayta Diosninchi Isquirbichishan bible

Salmos 35

¹David isquirbishan alabansa. TAYTA DIOS chiquimajcunapitaga washaycamay. Magamajcunawanga pillyay.

²Chapacuna escüduyquiwan shamuy yanapämänayquipaj.

³Gaticachämajcunawanga gam pillyay. «Paycunapitaga salbashayquimi» nimay.

⁴Wañuchiyta munamajcunaga pengaycho quëdachun. Mana allita ruramayta munajcunaga pengay-tucusha gueshpichun.

⁵TAYTA DIOSPA anjilnin apaptin ricacuchun rïgupa punshanta wayra apashanno.

⁶TAYTA DIOSPA anjilnin gaticachaptin paycunapäga nänipis ticracurichun chacaj y llushcaman.

⁷Mana imatapis rimapaycaptillämi togllata churasha. Uchcuta uchcusha chayman yaganäpaj.

⁸Quiquincunata illajpita mana alli chayachun. Toglla churashallanman quiquincuna watacächun. Mana allicunaman tunichun.

⁹Chauraga TAYTA DIOS yanapämashanpitami cushicushaj. Salbamashanpitami fiyupa cushicushaj.

¹⁰Llapan shongöpami nishaj: «Gammanga TAYTA DIOS, manami pipis tincunchu. Umildicunatawan pobricunataga jorgunquimi mas munayniyojcunapa y engañar suwapajcunapa maquinpita.»

¹¹Rantiy testïgucunami yurin. Paycunami tapuman mana musyashäcunata.

¹²Alli yanapashäpitami mana alliwan cutichiman. Chaymi fiyupa llaquicö.

¹³Nogami ichanga paycuna gueshyaptinpis fiyupa llaquicoj cä. Gachga röpacunata jaticur ayunaj cä. Shongullächo mana cachaypa Tayta Diosta mañacuycaj cä.

¹⁴Fiyupa llaquishalla purejpis cä. Mamäpaj, amïgöpaj, wauguëpaj lütu caycajnöraj llaquicoj cä.

¹⁵Mana alliman chayaptëmi ichanga paycuna llapan asipämasha. Juc-lä runacunanömi mana cachaypa magamar ñacachimasha.

¹⁶Wacpita-caypita gayapämashpan asipämasha. Fiyupa chiquimar fiyu ñawinwan ricapämashapis.

¹⁷Tayta Dios, ¿imaycamaraj fiyucunata ricapanqui? Liyuncunanöpis gaparaycar puriycajpita salbaycamay ari.

¹⁸Acrashayqui runacunapa ñaupanchömi agradësicushayqui. Aypalla runacunapa ñaupanchömi alabashayquipis.

¹⁹Chiquimajcunaga ama cushicuchunnachu. Manacajpita chiquimajcuna ñipchipämänanta ama munaycuychu.

²⁰Paycunaga manami munanchu alli cawaytaga. Cay nasyuncho alli goyäcoj runacunata mana alli goyächinallanpämi yarpachacurcaycan.

²¹Jatunta äyarcur-äyarcur nogapa conträmi jitaparcaycäman «Quiquëcunami ñawëpa ricashcä» nir.

²²TAYTA DIOS, gamga musyanquimi imano cashantapis. Upällallaga ama cacuychu. Nogata ichanga ama gongaycamaychu.

²³Tayta Dios, faburnë jatariy ari. Ricchayna. Rasun cajta jusgamay ari.

²⁴Gamga canqui juchaynaj TAYTA DIOSMI. Alli arriglamashpayqui salbamay ari. Nogapäga ama pipis cushicuchunchu.

²⁵Ama yarpächunchu ni rimachunpischu «Chayno canantami munaranchi» nir; «Fiyupa mana allimanmi chayachishcanchi» nir.

²⁶Mana alliman chayashäpita cushicurcaycajcunaga pengaycho ricacuchun. Nogapita mas alli-tucojcunaga fiyupa pengaycho cachun.

²⁷Llapanpita allicho llojshinäta munajcuna ichanga cushicushpan gayarayparaj cantachun. Paycunaga cayno nichun. «TAYTA DIOSGA alabasha cachun. Payga sirbejnin jauca goyänantami munan» nir.

²⁸Alli arriglaj cashayquitami pï-maytapis willapäshaj. ¡Goyay goyaymi alabashayqui!