Read Tayta Diosninchi Isquirbichishan Salmos 38 Bible Online

Salmos 38 - Tayta Diosninchi Isquirbichishan bible

Salmos 38

¹Yarpächinanpaj David rurashan alabansa. TAYTA DIOS, rabyasha caycashpayquega ama piñacamaychu. Ollgusha caycarpis ama castigamaychu.

²Lëchayquipis cuerpöchömi jaticasha caycan. Maquiquiwanmi ñacachimashcanqui.

³Rabyasha piñacamaptiquimi intëru cuerpöpis manana sänunachu. Juchäpitami tullöcunapis manana sänunachu.

⁴Juchä atipashami caycä. Chaymi lasaj guepino ñacaycächiman.

⁵Mana yarpachacuypa rurashäpitami guerëcunapis ismur asyaricurisha.

⁶Llaquishalla, jagayashalla, uysucushallami purëpis.

⁷Rupaywan wajtäpis rauraycan. Intëru cuerpömi nanaycan.

⁸Callpäpis mananami cannachu. Wirur-ushashanömi nanapäcuycä. Chaymi llapan shongöpa llaquicur ataycä.

⁹Tayta Dios, imata munaycashallätapis gamga musyanquimi. Llaquicuycashäcunapis manami pacaranchu.

¹⁰Shongöpis tic-ticyaycanmi. Callpäpis manami cannachu. Ñawëpis chacaycannami.

¹¹Guerëcuna captinmi llapan amïgöcunapis, castäcunapis carullachöna carcaycan.

¹²Wañuchimayta munajcunaga togllatami churaparcaycäman. Mana allita ruramayta munamajcunaga illgächimaytami yarparcaycan. Imay örapis mana allita ruramayllatami yarpaycan.

¹³Chaypis nogaga mana wiyaj upanömi cacö. Mana rimaj upano imatapis mana rimacöchu.

¹⁴Imata nimaptinpis manami wiyaj-tucöchu. Upanömi imata nimaptinpis mana cutichëchu.

¹⁵TAYTA DIOS, gamtami shuyaraycä. Nogapa faburnë gam rimarcuy ari.

¹⁶Ichanga ruwacushayqui Tayta: Tuniptë-imaga ama camacächiychu nogata asipämänanta.

¹⁷Illajpitanami tunej-aywä. Intëru cuerpö nanaycaj manami rätullapis chawaycunnachu.

¹⁸Juchata rurashäpitami fiyupa llaquicö. Chaymi jucha rurashäta willacushaj.

¹⁹Chiquimajcunaga aypallanami miracurcusha. Mana imatapis rimapaycaptillämi achcaj chiquicarcamasha.

²⁰Noga allita rurashäpita mana alliwanmi cutiycächiman. Noga alli cajllata ruraptëmi paycunaga chiquicarcäraman.

²¹TAYTA DIOS, ama japallätaga cachaycamaychu. Ama gongaycamaychu ari.

²²Imaypis salbamaj Tayta Dios, juclla yanapaycamay ari.