Read Tayta Diosninchi Isquirbichishan Salmos 39 Bible Online

Salmos 39 - Tayta Diosninchi Isquirbichishan bible

Salmos 39

¹David isquirbishan alabansa. Jedutún cantashan. Nogaga yarparä fiyu runacunapa ñaupancho cashä öra allilla goyaytami, upällalla cacuytami, mana quijacuytami.

²Mana imatapis rimacuypami upa-tucur cacurä. Allita ni mana allitapis manami parlacurächu. Chaypis pasaypami pashtapacuyta munaycarä.

³Shongöpis rupariycämuran. Yawarnëpis timpuricuriran. Chaymi rimarir nirä:

⁴«TAYTA DIOS, musyachimay imano ushacänäpaj cashantapis, imaycama cawanäpaj cashantapis. Musyachimay pöcu diyalla cawaj cashätapis.

⁵Nogataga cawaycächimanqui wallca diyallami. Nogapa cawaynëga gampaj manami aycäpischu. Pï-maypis cawan jämayta cachaynöllami. Selah

⁶«Llapan runacunapis cawan llantuyno päsacojllami. Yangallami imatapis shuntacusha gotucusha. Manami musyanchu riquësancunawan pï quëdananpaj cashantapis.

⁷Tayta Dios chayno caycaptenga ¿imatanataj shuyaräshaj? Gamllamanna yäracamushaj.

⁸Llapan juchäpita jorgaycamay ari. Ama camacaycachiychu rumi shongucuna asipämänantaga.

⁹Gam llapantapis camacächiptiquimi imatapis mana rimacurächu.

¹⁰Amana castigamaynachu ari. Castigamashpayquimi wañuycächimanquina.

¹¹Jucha rurashancunapita castigar-rämi runataga tantiyachinqui. Cuyaynin cajtaga puyunömi ushaparinqui. Runacunaga llapanpis cawan jämayta cachaynöllami. Selah

¹²«TAYTA DIOS, wiyaycamay ari mañacaycämushäta. Wagaycaptëga ama ricapäcamaychu. Gampäga noga cä jäpa runanöllami. Unay caj awilöcunanöpis manapis aycällatami wañucushaj.

¹³Amana ricapämaynachu. Ichic cacharcamay ari cay pachacho cawashäcamallapis cushisha goyapärinäpaj.»