Read Tayta Diosninchi Isquirbichishan Salmos 40 Bible Online

Salmos 40 - Tayta Diosninchi Isquirbichishan bible

Salmos 40

¹David isquirbishan alabansa. TAYTA DIOS juclla yanapämänantami shuyarashcä. Paynami wiyamar yanapämasha.

²Mitu sinigaman jaticänäpitami jorgamaran. Wanwanyaycaj uchcupitami salbamasha. Rumi jananman ichichimaran. Allinnin pachaman churamaran.

³Tayta Diosmi yarpayta gomaran mushoj alabansata cantanäpaj. Imano päsamashantapis musyaycur runacunaga fiyupa almiraran. Chaynöpami TAYTA DIOSMANNA yäracuran.

⁴Cushishami cawanga TAYTA DIOSLLAMAN yäracöga, alli-tucojcunata mana tapucöga, ni ïdulucunamanpis mana riguëga.

⁵Gamga TAYTA DIOS, aypallatami milagrucunata rurashcanqui. Nogacunataga imay örapis yarparaycämanquimi. Chaycunata willacushpämi pï-maytapis willapayta munä. Ichanga willapaytapis manami ushämanchu. Manami imapis tincunchu gammanga tayta.

⁶Gamga manami cushicunquichu uywacunata pishtapäshushallayquipita, ni chaqui micuycunata garashushallayquipitapis. Aychata rupachipäshushallayquipitaga manami perdunanquichu. Chaycunapa ruquenga gamta wiyacunallätami munanqui.

⁷Chaymi nishcä: «Caychömi caycä. Laychöpis nogapämi isquirbiraycan.

⁸Tayta Dios, gam munashayquita rurarmi cushicö. Layniquicunatapis llapantami yarparaycä.»

⁹Acrashayqui runacunapa ñaupanchömi alli cashayquita willacushcä. Manami amucurcushcächu. Chaytaga gam musyaycanquimi.

¹⁰Gam alli cashayquitaga manami upällacushcächu. Llapanta cumlej cashayquita salbacoj cashayquitaga willacushcämi. Acrashayqui runacunatami willapashcä cuyacoj cashayquita, rasun cajta rurashayquita.

¹¹TAYTA DIOS, cuyapaycamay ari; ama ñïgamaychoga. Aunishayquita cumlej cashpayqui imaypis chapaycamay.

¹²Yupaytapis mana atipaypämi mana allicunaga chayamasha. Quiquë mana allita rurashäcunallami chayamasha. Chaycunapita imanöpa llojshiytapis manami camäpacöchu. Balurnëpis manami cannachu. Juchäcunaga ajchäpitapis mas aypallami.

¹³Taytallau tayta, salbaycamay ari. TAYTA DIOS, canan öra shaycamuy yanapämänayquipaj.

¹⁴Wañuchimayta munajcunaga pengay-tucushpan umpuycachächun. Mana allita rurayta munamajcunaga pengay-tucusha gueshpichun.

¹⁵Asipämajcunaga pengay-tucusha aywacuchun.

¹⁶Gamman yäracamojcuna ichanga cushicuchun. Gam salbanayquita munaycajcunaga imaypis «¡TAYTA DIOSGA munayniyojmi!» nichun.

¹⁷Tayta Dios, noga pobriyasha llaquicuycajta ichanga ama gongaycamaychu. Gammi canqui yanapämaj imapitapis jorgamaj. Juclla yanapaycamay ari.