Read Tayta Diosninchi Isquirbichishan Salmos 41 Bible Online

Salmos 41 - Tayta Diosninchi Isquirbichishan bible

Salmos 41

¹David isquirbishan alabansa. Cushishami cawanga pobricunatawan wacchacunata yarpäga. Chay runataga ima disigrasya chayaptinpis TAYTA DIOS salbangami.

²TAYTA DIOSMI imapitapis chapanga. Pay yanapaptin unaycama cawanga. Cay pachachöga cushishatami goyächenga. Manami cachaycongachu chiquejcuna munashanta ruracunanpäga.

³TAYTA DIOSMI yanapanga pasaypa caycashanpita jatarinanpaj. Ima gueshyapitapis allchacächengami.

⁴Tayta Diostami ruwacushcä: «TAYTA DIOS cuyapaycamay ari. Juchata rurashäpitami gueshyaycä. Allchacaycachimay ari» nir.

⁵Chiquimajcunaga fiyupami munan mana alliman chayanäta. Chaymi «¿imayraj wañonga gongacänanpaj?» nircaycan.

⁶Ricamaj shamushpanpis janan shongullami parlan wiyanäpaj. Mana alli cajcunata shongullancho yarpan. Nircur washäta parlaraycar aywacun.

⁷Shuntacaycärirmi washäta riman. Paycunaga yarpan juchäpita ñacaycashätami.

⁸Chaymi nin: «Chay gueshyawanga dyablumi gueshyachisha. Cämanpitaga imaypis mananami jatarengapänachu» nir.

⁹Fiyupa cuyanacushä, yäracushä runa, iwal micushäpis cananga conträmi ricacusha.

¹⁰Gam ichanga TAYTA DIOS cuyapaycamay ari. Jitaraycashäpita jatarcachimay ayñita cutichinäpaj.

¹¹Chaynöpami nogaga musyashaj gampaj alli caycashäta. Chiquimajcunapis manami cushiconganachu «Binsishcä» nir.

¹²Munashayquino allillata rurasha caycaptëga manami cachaycamashcanquichu. Ñaupallayquichömi imaypis cachimashcanqui.

¹³Cananpis imaypis alabasha cachun Israelcunapa TAYTA DIOSNENGA. Chayno caycullächun ari.