Read Tayta Diosninchi Isquirbichishan Salmos 45 Bible Online

Salmos 45 - Tayta Diosninchi Isquirbichishan bible

Salmos 45

¹Corëpita mirajcuna isquirbishan alabansa. Shongullächömi yarpaycä allita rimanäpaj. Imanöparaj cuyayllapaj alabansacunata jorgöman rayta alabanäpaj. Paypämi cantashaj.

²Gamga llapan runacunapitapis mas cuyayllapämi canqui. Maysi wiyacuylla allillami parlanqui. Chaymi Tayta Diosga imaycamapis bindisyunta goycäshunqui.

³Jinyu ray, sabliquita chegllayquiman jaticuy. Tayta ray, chaywanga achicyaypa achicyar sumajmi camaranqui.

⁴Cawalluta muntacurcur binsej binsejllana guërraman ayway. Aywanqui alli cajllatana llapanpis rurananpaj, umildicunapa faburnin pillyaj. Derëchu caj maquiquimi ruranga fiyupa almiraypajcunata.

⁵Gampa lëchayquicunaga llauchi punta cashpanmi chiquishojcunapa shonguncamapis chayarin. Tayta ray, llapan runacunami gammanga gongurpacamonga.

⁶Tayta Dios camacächiptin mandaycashayquega para-simrimi. Gamga llapantapis allimi mandanqui.

⁷Alli cajtaga cuyanquimi, mana alli cajtaga chiquinquimi. Chaynöpami Tayta Dios acracushurayqui. Waquin yanasayquicunapitami acracushurayqui. Gamtaga sumaj cushicachishurayqui.

⁸Alli caj perfümi alli asyashannömi röpayquipis alli asyaycan. Cuyayllapaj marfilwan adurnasha palasyuyquichömi cushicachishunqui arpacunata tucapäshushpayqui.

⁹Palasyuyquichöga raycunapa warmi wamrancunami caycan. Jamarashayquipa derëchu caj-läduyquichönami casaranayquipaj caj rayna caycan. Paypa röpanga caycan mas fïnu caj goriwan adurnashami.

¹⁰Sumaj wiyamay ïja. Willapashätaga sumaj tantiyacuy. Marca-masiquitawan famillyayquitaga amana yarparaynachu.

¹¹Cuyayllapaj captiquimi gamtaga ray munacushurayqui. Paymi canga taytayqui. Payta wiyacuy.

¹²Tiro runacunami gamman shamonga imatapis goycushunayquipaj. Rïcunnin caj runacunapis yanapänayquipämi ruwacushunquipaj.

¹³Raypa jipash wamranmi cuyayllapaj shuyaraycan. Röpanpis caycan goriwan burdashami.

¹⁴Cuyayllapaj burdasha röpayojtami ray cajmanga pushan. Donsëlla warmicunapis yan'gaycan. Yanasancunami fïlayllanpa aywaycan.

¹⁵Cushishami aywarcaycan raypa palasyunman cushisha yaycunanpaj.

¹⁶Tayta ray, wamrayquicunami unay caj awiluyquicunano mandaj cangapaj. Gammi yanapanquipaj cay nasyunchöga llapanta mandananpaj.

¹⁷Nogami alabansacunawan jutiquita yarpächishäpaj taytancuna wañuptin wamrancuna mirajchöga. Chaynöpami intërucho llapan runacuna imaycamapis gampaj allita parlangapaj.