Read Tayta Diosninchi Isquirbichishan Salmos 48 Bible Online

Salmos 48 - Tayta Diosninchi Isquirbichishan bible

Salmos 48

¹Corëpita mirajcuna isquirbishan alabansa. TAYTA DIOSNINCHËGA munayniyojmi. Tayta Diosninchïtaga alabashun rispitädu lömancho caycaj siudänincho.

²Sión lömaga cuyayllapämi. Chaychöga caycan munayniyoj Raypa siudäninmi. Chaymi llapan runacunapis fiyupa cushicun.

³Curalaraycaj Sionchömi Diosga caycan. Diosga imapitapis chapämanchïmi.

⁴Achca raycuna shuntacaycur chay siudämanmi pillyaj aywaran.

⁵Siudäta ricärir ichanga fiyupa manchariran. Imata ruraytapis mana camäpacur jinan öra gueshpir aywacuran.

⁶Paycunataga pasaypa manchariy charicuycuran. Warmita gueshyacuy nanay charishannömi nanay charicuycuran.

⁷Tarsispita shamoj büquicunata löcu wayra paquir-ushashannömi chay runacunataga usharishcanqui.

⁸Wiyashanchïnömi rasunpa ricashcanchi, llapanpaj munayniyoj TAYTA DIOSNINCHÏPA siudäninchöga. Chay siudänin imaypis mana illgänanpämi Pay camacächenga. Selah

⁹Tayta Dios, Templuyquicho caycashächömi yarpärishcäcuna fiyupa cuyacoj cashayquita.

¹⁰Tayta Dios, cay pachachöga intëruchömi alabashunqui. Gamga alabasha canayquimi camacanpis. Munayniyoj carmi llapantapis allilla mandanqui.

¹¹Sión lömachöga, Judá siudäcunachöga cushicun allita rurashayquipitami.

¹²Siontaga intëru cantunpa tumay. Ricchacuna törrincuna ayca cashantapis yupay.

¹³Sumaj ricay imano palasyun cashantapis, intëru cantupa tumariraj pergancuna imano cashantapis. Ricashayquitami willapanquipaj guepa wiñaj wamracunata.

¹⁴Paycunata willapanqui imaypis Tayta Dioslla Diosninchi cashanta. Payllami imaypis pushamäshunpaj.