Read Tayta Diosninchi Isquirbichishan Salmos 49 Bible Online

Salmos 49 - Tayta Diosninchi Isquirbichishan bible

Salmos 49

¹Corëpita mirajcuna isquirbishan alabansa. Llapayqui wiyaycäriy. Cay munducho tiyajcunaga sumaj wiyay.

²Sumaj wiyay rïcucunapis, pobricunapis. Munayniyojcunapis, umildicunapis wiyay-llapa.

³Yarpachacuycurmi rimamushaj. Yarpachacunapaj cajcunatami parlamushaj.

⁴Sasa tantiyaypaj cajcunatami rimashaj. Arpa wagashan-tupunami nishaj chay rimashä ima ninan cashantapis.

⁵Nogaga manami mancharishächu llaquicuycuna chayamuptinpis. Manami mancharishächu chiquimajcuna mana allita ruramashan chayamaptinpis.

⁶Conträcunaga yäracun ima-aycatapis charashallanmanmi. Aypallata charashpan yarpan imaypis mana ushacänantami.

⁷Chayno cashpanpis Tayta Diostaga manami päganmanchu para-simri cawananpaj. Quiquillanpitaga manami salbacunmanchu.

⁸Runacuna bïdanta rantinanpäga manami ayca guellaypis aypanchu.

⁹Runaga para-simri manami cawanchu. Runaga wañojllami.

¹⁰Ricashanchïnöpis llapanmi wañun. Musyaj-yachajcunapis, upacunapis wañunmi. Llapan ima-aycanpis jucpänami quëdan.

¹¹Chacrancunata quiquinpa jutinta churapasha captinpis, sepultürarämi mana ushacaj wasenga. Chaychörämi para-simriga goyanga.

¹²Runaga may-jina rïcu carpis manami para-simriga cawanchu. Uywacunanöllami wañun.

¹³Chaynömi wañun quiquillanman yäracojcunaga. Chaynömi ushacanga quiquin alabacojcunaga. Selah

¹⁴Chay runacunaga carcaycan michejta gatiraj uyshanömi. Wañuymi paycunataga pushacuycan wañojcuna caycashan cajman. Chaycho riccharcamuptin allita rurajcunami munaynincho chararanga. Chaychöga ima-aycanpis mananami canganachu. Sepultürallanami canga para-simri wasin.

¹⁵Nogatami ichanga wañuypita Tayta Dios salbamanga. Paymi pushacamanga. Selah

¹⁶Pipis rïcuyaptin, alli wasita ruraptenga ama rabyapaychu.

¹⁷Wañorga manami ima-aycantapis apangapächu. Ima-aycanpis manami sepultüraman gatengapächu.

¹⁸Cawar cushisha goyaptin, rïcu captin runacuna alabaptinpis

¹⁹imayllaga wañongami. Mananami achicyaj pachata ricangapänachu.

²⁰Runaga may-jina rïcu carpis para-simriga manami cawanchu. Uywacunanöllami wañun.