Read Tayta Diosninchi Isquirbichishan Salmos 50 Bible Online

Salmos 50 - Tayta Diosninchi Isquirbichishan bible

Salmos 50

¹Asaf isquirbishan alabansa. Munayniyoj TAYTA DIOSNINCHÏMI gayachisha cay pachacho tiyajcunataga juc cantupita juc cantucama.

²Cuyayllapaj Sión siudäpita-pachami Tayta Diosga achicyaypa achicyaycan intëruman.

³Tayta Diosninchëga manami mana musyacayllachu shamonga. Paypa ñaupantaga shamonga ima-aycatapis rupar ushacurcoj ninami. Paypa intërun tumarejpana shamun fiyu wayra.

⁴Chayaycamurmi syëluta y cay pachata gayanga. Chayno gayanga acrashan runacunata jusgaptin testïgu cananpämi.

⁵Chaymi syëluta y cay pachata nin: «Mana cachaypa wiyacamajcunataga shuntamuy. Uywancunata sacrifisyupaj pishtashpan nogawan conträtuta rurajcunatapis shuntamuy.»

⁶Syëlucho cajcunami nin Diosga pï-maypäpis alli cashanta, alli arriglaj juez cashanta. Selah

⁷«Acrashä Israelcuna wiyamay. Nogallami cä Diosga. Nogami cä gamcunapa Diosniqui. Cananga gamcunapa contrayquimi parlashaj.

⁸Imatapis garamashayquipitachu, imaypis uywacunata nogapaj rupachishayquipitachu manami piñacö.

⁹Manami besëra-mallwacunatarächu munä. Ni guenchayquicho caycaj chïbucunataräpischu ashë.

¹⁰Llapan chucaru animalcunapis, altu jircacunacho tiyaycaj wäcacunapis nogallapami.

¹¹Nogallapami puntacunacho caycaj äbicunapis, intëru jircacho caycaj animalcunapis.

¹²Munduga nogapami, llapan chaycho caycajcunapis. Yargarpis manami gamtaga ‹garamay› nëmanchu.

¹³¿Nogaga törucunapa aychantachuraj sacsä? ¿Chïbucunapa yawarnintachuraj upö?

¹⁴Nogaga janaj pachacho caycaj Diosmi cä. Nogaga mas munä llapan shonguyquipa agradësicamänayquitami; aunimashayquita llapanta cumlimänayquitami.

¹⁵Ñacaycho caycashayqui öraga mañacamay. Nogami jorgushayquipaj. Gamnami agradësicamashpayqui alabamanquipaj.»

¹⁶Fiyu cajcunatami ichanga Tayta Dios nin: «Gamcunaga ¿imanirtaj laynëcunapaj parlanqui? Conträtuta rurashäpitapis manami parlayllapis parlarcunquimanchu.

¹⁷Gamcunataga manami gustashunquichu noga piñacushä. Imano ruranayquipaj nishätapis manami cumlinquichu.

¹⁸Suwacunatami alli jamachinqui. Majayoj caycar jucwan cacojcunawan iwalmi goturpanqui.

¹⁹Mana allita rimanayquipaj, llullacunayquipaj ichanga shimiquipis cushishallaraj rimarcärin.

²⁰Chay wasillacho tiyaycarmi calumyanqui. Chay wauguilla caycarpis paypa washanmi rimanqui.

²¹Chayno llapanta ruraptiquipis upällami cacushcä. ¿Gamnölla cashätachu yarpashcanqui? Chayno rurashayquipitaga piñacushayquimi. Llapanpitami jusgashayqui.

²²«Nogata mana yarpämajcuna, sumaj tantiyacuy. Illajpitami gamcunataga ichic-ichicllaman rurarishayqui. Chauraga manami pipis salbashunquipächu.

²³Nogata rispitamajcunaga imaypis agradësicamanmi. Jucha rurayninta jaguirishpan Noga munashäta rurajcunataga salbashämi.»