Read Tayta Diosninchi Isquirbichishan Salmos 51 Bible Online

Salmos 51 - Tayta Diosninchi Isquirbichishan bible

Salmos 51

¹David Betsabëwan juchata rurashanpita, profëta Natán piñacuptin cay alabansata David isquirbiran. Tayta Dios, gamga cuyapäcojmi canqui. Cuyapaycamay ari. Alli shongumi canqui. Juchäcunata perdunaycamay ari.

²¡Mana allicunata rurashäpita mayllaycamay! ¡Llapan juchäpita limyuyaycachimay!

³Musyämi contrayqui jatarishäta. Juchäcunatapis yarpaycämi.

⁴Gamta mana wiyacushpämi contrallayqui jatarishcä. Ricaycämaptiquimi llutanta rurashcä. «Juchasapa» nimar rasun cajtami niycämanqui. Manami «Juchaynaj cä» nëmanchu.

⁵Mamäpa pachancho cashäpita-pachami juchasapa caycä. Yurishäpita-pachapis juchasapallami caycä.

⁶Chaypis gamga cuyanqui rasun cajta rimaj cajtami. Shongullächömi yachachimashcanqui yachaj canäpaj.

⁷Llapan juchäta pichaycuy ari. Chauraga limyunami cashaj. Mayllaycamay. Chauraga rashtapitapis mas yurajnami ricacushaj.

⁸Cushicurcaycajta ricachimay ari. Chauraga llaquicachimasha captiquipis yapaynami cushicushaj.

⁹Juchata rurashäcunataga gongaycuyna. Mana allita rurashäcunata ama yarpaynachu.

¹⁰Tayta Dios, shongöta rucaycachiy ari. Unay cashäpita mas allina canäpaj yanapämay.

¹¹Ama gargamaychu ñaupayquipitaga. Ama apacuychu nogacho caycaj santo espirituyquitaga.

¹²Salbamashayquipita cushicaycachimay ari. Cuyapäcoj cashpayqui yanapaycamay ari.

¹³Chaynöpami mana wiyacojcunata willapäshaj gamllata wiyacushunayquipaj. Chaura juchasapacunaga gam munashayquinöllana cawanga.

¹⁴Tayta Dios, gammi salbamajnë canqui. Wañuchicushäpita perdunaycamay ari. Chauraga cantashpämi willacushaj gam alli cashayquita.

¹⁵Tayta Dios yarpayta gomay ari gamta alabanäpaj.

¹⁶Gamga manami cushicunquichu imatapis garashushayquipita. Chayta munaptiquega uywacunata rupachishpä gamta gararëmanmi.

¹⁷Gampäga caycan umildi cajcunami y wiyacushoj cajcunami allinninta garashushayquino. ¡Tayta Dios, gamga manami manacajman churanquichu llapan shongunpa arpinticoj cajtaga!

¹⁸Cuyashpayquega Sión lömata alli ricay ari. Jerusalenpa curralnincunata yapay jatarachiy.

¹⁹Chaymi ichanga chasquinquipaj garashushayquita. Altarniquichöpis rupachengapaj töru-mallwacunata.