Read Tayta Diosninchi Isquirbichishan Salmos 55 Bible Online

Salmos 55 - Tayta Diosninchi Isquirbichishan bible

Salmos 55

¹David isquirbishan alabansa. Tayta Dios, mañacamushätaga wiyaycamay ari. Rinriquitaga ama chapacurcuychu.

²Yanapaycamay ari. Fiyupa llaquicurmi mañacaycämö.

³Fiyucuna gaparpashanwan, chiquimajcuna parlashanga mancharachimanmi. Fiyupami llaquicachimasha. Rabyacarcärirmi usharamayta munan.

⁴Chaura shongöpis tic-ticyaycanrämi. Wañuypis janächönönami ricacun.

⁵Fiyupa manchariychömi caycä. Manchariyllawanmi sicsicyaycä.

⁶Chaymi yarpachacur në: «Palumapano äläcuna canman. Chauraga pärir aywacur jamaycömanrämi.

⁷Pärir aywacöman fiyupa carumanmi. Chunyaj chaqui jircachöna tiyacöman. Selah

⁸Chaychömi fiyu wayrapita, löcu tamyapita pacaräcöman.»

⁹Tayta Dios, fiyucuna yarpashantaga pirdirachiy. Rimaynincunatapis amana tantiyanacuchunchu. Siudächöga caycan pillyallami, rimanacuyllami.

¹⁰Chacaypa junajpapis intëru siudäpami purircaycan. Achäquillatami ashipänacurcaycan. Llapanpis pirdicashanami carcaycan.

¹¹Läsacunachöpis fiyupa mana allicunallatami rurarcaycan; llullapänacurcaycan.

¹²Conträ achäquita ashipämaptenga awantacömanmi. Chiquimaj conträ jatariptinpis gueshpicömanmi.

¹³Ichanga gammi amïgö caycar, iwal purej caycaptinchi chayno ruramashcanqui.

¹⁴Gamwanga amïgu cashpanchïmi Tayta Diospa Wasinmanpis iwal yaycoj canchi. Gamwanga aypalla runacunachöpis iwalmi purej canchi.

¹⁵¡Chiquimajcunaga illajpita wañuchun! ¡Mana allillata rurashanpita cawaycajllatana pachapis micucurcuchun!

¹⁶Nogami ichanga Tayta Diosta mañacushaj. TAYTA DIOSGA salbamanga.

¹⁷Pagasta junajtapis wagashpä Tayta Diosta mañacushaj. Payga llapan mañacushäta wiyamangami.

¹⁸Pillyacunachöpis paymi chapämanga. Aypalla chiquimajcunapitapis mana wañuchimänanpämi salbamanga.

¹⁹Paycunaga mana allita rurarcaycashanta manami cachanchu. Tayta Diostapis manami manchacunchu. Imaycamapis mandaj Tayta Diosga mañacushäta wiyamar paycunata pengacachengami. Selah

²⁰Paycunaga amïguncunatapis magan. Alli cananpaj parlashanta manami cumlinchu.

²¹Paycunaga mishquillami parlan. Shongunchöga wañuchicuyllatami yarparcaycan. Mishquichipayllapa parlarpis ashllicuyllatami yachan.

²²Yarpachacaycächishushayquitaga TAYTA DIOSPA maquinman cachaycuy. Paymi yanapäshunquipaj. Wiyacojcunataga TAYTA DIOS manami cachaycongapächu.

²³Tayta Dios, wañuchicojcunawan llullacunaga pöcu timpulla cawachun. Amana chayachunnachu pullallanmanpis cawananpaj cajmanga. Gam camacaycachiy paycuna illajpita wañunanpaj. Nogami ichanga gamllaman yäracamö.