Read Tayta Diosninchi Isquirbichishan Salmos 56 Bible Online

Salmos 56 - Tayta Diosninchi Isquirbichishan bible

Salmos 56

¹Gat particho Filistea runacuna Davidta prësu charishanpita, David isquirbishan alabansa. Tayta Dios, cuyapaycamay ari. Runacunami gaticachaycäman. Imay örapis magaycäman, ñacaycächiman.

²Chiquimajcunaga imay örapis gaticachaycämanmi. Alli-tucojcunaga achcajmi magarcaycäman.

³Tayta Dios, manchacushpäga gammanmi yäracamö.

⁴Tayta Diosllamanmi yäracö. Aunimashanman yäracurmi payta alabä. Chaymi mana manchacöpischu. ¿Imataräshi ruramanman runallaga?

⁵Imay örapis nanächipaycämanmi. Mana allita ruramayllatami yarparcaycanpis.

⁶Wañuchimänanpämi michipaycäman. Maypa purishallätapis ricapaycäman.

⁷Tayta Dios, chiquimajcunataga rabyacurcur pengayman churay. Castigänitaga ama cachaycuychu.

⁸Ayca cuti gueshpishallätapis gamga musyaycanquimi. Ayca cuti wagashallätapis gamga ricamashcanquimi. Chaycunataga gammi libruyquicho apuntaraycächinqui.

⁹Yanapämänayquipaj mañacamuptë chiquimajcuna pillyaj shaycämushanchöpis cuticongami. Rasunpami musyä faburnë caycashayquita.

¹⁰TAYTA DIOSMANMI yäracö. Aunimashanman yäracurmi payta alabä. Taytallämanmi yäracö. Aunimashanman yäracurmi paytaga alabä.

¹¹Chaymi mana manchacöpischu. ¿Imataräshi ruramanman runallaga?

¹²Tayta Dios, aunishäcunataga cumlishayquimi. Altarniquipa ñaupanchömi agradësicushayqui.

¹³Gamga salbamashcanqui wañunäpitami. Mana alliman chayanäpitapis jorgamashcanquimi gam nimashayquita cumlir cawanäpaj. Chaynöpami achicyajchöno ñaupayquicho goyäshaj.