Read Tayta Diosninchi Isquirbichishan Salmos 57 Bible Online

Salmos 57 - Tayta Diosninchi Isquirbichishan bible

Salmos 57

¹David isquirbishan alabansa. Saulpita gueshpir aywar chunyaj machayman pacacushanta yarpärirmi isquirbiran. Tayta Dios, cuyapaycamay ari. Gamman pacacaycämuptëga cuyapaycamay ari. Mana allicuna päsanancamami älayqui rurinman pacacuyta munä.

²Syëlucho caycaj Tayta Dios imaypis yanapämaptiquimi gamta mañacamö.

³Cuyapäcoj cashpayqui syëlupita-pacha yanapämay ari. Chiquimajcunapita salbaycamay ari. Selah Yanapaycamay ari.

⁴Nogaga runa micoj liyuncunapa chaupincho caycajnömi caycä. Liyuncunapa quiruncunanömi caycan lëchancuna, tucsicunancuna. Gallunnömi caycan afilasha sablincunaga.

⁵Tayta Dios, gamga janaj syëluchöpis llapanpämi munayniyoj caycanqui. Cay pachapis intërumi munaynillayquicho caycan.

⁶Chiquimajcunaga purinäman togllata churasha. Chaura nogaga fiyupa mancharishcä. Purinächo uchcuta uchcuran yaganäpaj. Chay uchcuman quiquincunallami yagasha. Selah

⁷Tayta Dios, shongöga ashac-ashacllami caycan. Gamta imnucunawan alabashayqui.

⁸Ricchariy ari shongullä. Gampis arpa ricchay ari. Arpa-mallwapis ricchay ari. Intitapis ricchachishänami.

⁹Tayta Dios, llapan runacunapa ñaupanchömi alabashayqui.

¹⁰Tayta Dios, cuyacoj cashayquega syëlucamami chayan. Alli cumlej cashayquipis asulyaraycaj pachacamami chayan.

¹¹Tayta Dios, gamga janaj syëluchöpis llapanpämi munayniyoj caycanqui. Cay pachapis intërumi munaynillayquicho caycan.