Read Tayta Diosninchi Isquirbichishan Salmos 59 Bible Online

Salmos 59 - Tayta Diosninchi Isquirbichishan bible

Salmos 59

¹Davidpa wasinman Saúl cacharan Davidpa wasinta täpananpaj; tutanninna wañuchinanpaj. Chayno cashanpitami David isquirbiran cay alabansata. Tayta Dios, chiquimajcunapita salbaycamay ari. Ñacachimajcunapita jorgaycamay ari.

²Fiyu runacunapita salbaycamay ari. Wañuchicojcunapita gueshpiycachimay.

³TAYTA DIOS, munayniyoj runacunami wañuchimänanpaj shuyarpaycäman. Nogaga manami ima juchatapis rurashcächu. Llapantapis wiyacushcämi.

⁴Nogaga allillatami rurashcä. Imatapis mana ruraycaptëmi wañuchimänanpaj juracuycan. ¡Apuray! ¡Yanapämay! ¡Masqui ricäramay imano caycashätapis!

⁵TAYTA DIOS, gammi munayniyoj Dios canqui. Gammi Israelcunapa Diosnin canqui. Riccharcur castigay ari mana rispitashojcunataga. Ama cuyapaychu fiyu runacunataga. Selah

⁶Chacaypami cutimun wagyaj allgunöpis gaparpaycar. Siudätapis tumarcaycan.

⁷Shimin tarishantami rimarcaycan. Pipis mana wiyashanta yarparmi pï-maytapis ashllin.

⁸TAYTA DIOS, paycunapitaga gam asicunquimi. Mana rispitashojcunataga asipanquimi.

⁹Nogami ichanga gamman yäracamö. Tayta Dios, gammi canqui chapämajnë. Gammi canqui pacacunä.

¹⁰Tayta Dios gamga cuyamanquimi. Chaymi shamunqui yanapämänayquipaj. Yanapämaptiquimi llapan chiquimajcunataga binsishatana ricashaj.

¹¹Ichanga mana wañuchiyllapa ñacachiy marca-masëcuna imaycamapis yarparänanpaj. Paycunataga munayniquiwan wacpa-caypa mashtacächishpayqui manacajman churay ari. Tayta Dios gammi imapitapis nogacunataga chapämanqui.

¹²Llapan rimashanchöpis juchallatami rimarcaycan. Quiquincuna runa-tucushanpita, manacajcunata jurashanpita mana alliman chayaycuchun ari.

¹³Rabyacurcushpayqui chipyaj illgarachiy. Intëruchöpis musyacächun gam Tayta Dioslla Israel runacunachöga ray cashayqui ari. Selah

¹⁴Chacaypaga cutimun wagyaj allgunöpis gaparpaycar. Siudäta tumarcaycan.

¹⁵Paycunaga micuyta ashishpanmi purenga. Sacsananyaj micuyta mana taricuycorga gaparpanga allgu aullajnörämi.

¹⁶Nogami ichanga cada tuta gamta alabashpä cantashaj. Munayniyoj cuyacoj cashayquitami willacushaj sinchi gaparayparaj. Gammi cashcanqui imapitapis chapämaj; llaquicur ñacaycashä öra pacacunä.

¹⁷Tayta Dios gamtami alabashayqui. Gammi canqui chapämaj pacacunä. ¡Gammi canqui cuyamaj Diosnë!