Read Tayta Diosninchi Isquirbichishan Salmos 66 Bible Online

Salmos 66 - Tayta Diosninchi Isquirbichishan bible

Salmos 66

¹Cantay yachaj isquirbishan alabansa. Cay pachacho tiyajcunaga llapan cushicur Tayta Diosta alabachun.

²Tayta Diostaga alabay-llapa. Paytaga munayniyoj cashanpita alabay-llapa.

³Tayta Diospaj cantar cayno niy: «Rurashayquega llapanpis fiyupa allimi. Fiyupa munayniyoj captiquimi chiquishojcunapis mancharisha ñaupayquiman gongurpacamun.

⁴Cay pachacho tiyajcunaga llapanmi adurashunqui. Alabansacunawanpis alabashunquimi.» Selah

⁵Tayta Dios rurashanta ricaj shamuy-llapa, Runapaj fiyupa allita rurashanta ricay-llapa:

⁶Lamartami ticrarachiran chaqui allpaman. Unay awilunchïcunaga mayutapis päsaran chaqui pampapa aywaycajnöllami. ¡Tayta Diosninchïta alabar cushicushun ari!

⁷Munayniyoj cayninwanmi imaycamapis mandanga. Imano cashantapis intëru nasyuntami ricapaycan. Chaura mana wiyacojcunaga paypa contran ama jatarichunchu. Selah

⁸¡Llapan runacuna Tayta Diosninchïta alabay! ¡Payta alabar alabansacunata cantay!

⁹Paymi canancamapis cawaycächimanchi. Manami ima mana allimanpis chayachimanchïrächu.

¹⁰Guellayta runa chulluchiptin ganran llojshishannömi yäracushäta mana yäracushätapis musyapämashcanqui Tayta Dios.

¹¹Gammi togllawan tunichimashcanqui. Fiyupa lasajtami apachimashcanqui.

¹²Gammi camacächishcanqui manacajcunallapis manacajman churamänanpaj. Chayasha mayuman yagajnömi, ninacho rupajnömi fiyupa mana allicunaman chayachimashcanqui. Chaypitarämi ima-aycapis cananpaj yanapämashcanqui.

¹³Wasiquiman yaycuycurmi gampaj uywacunata rupachishaj. Chaychömi cumlishayqui

¹⁴fiyupa ñacaycho caycashpä aunishäta.

¹⁵Gampämi rupachishaj sëbasha uywacunapa aychanta. Uyshacunatami pishtashaj. Törucunata, chïbucunatami garashayqui. Selah

¹⁶¡Tayta Diosta manchacoj cäga llapaniqui shamuy! ¡Nogapaj imata rurashantapis willapäshayqui!

¹⁷Nogaga Tayta Diostami mañacurä. Nircorga alabansacunata cantarä.

¹⁸Mana allita yarpashpä mañacuptëga Tayta Dios manami wiyamanmanchu caran.

¹⁹¡Payga wiyamashpanmi llapan mañacushäta yanapämasha!

²⁰Alabasha cachun Tayta Diosga. Payga mañacushäta wiyashami. Cuyamashantapis musyachimashami.