Read Tayta Diosninchi Isquirbichishan Salmos 68 Bible Online

Salmos 68 - Tayta Diosninchi Isquirbichishan bible

Salmos 68

¹David isquirbishan alabansa. Tayta Dios jatarinman ichanga chiquejcuna mashtaypa mashtar gueshpinanpaj, chiquejcuna ñaupanpita gueshpir aywacunanpaj.

²Goshtay wayracho illgajno illgächun. Ninacho sëra chullojno ushacächun. ¡Mana allita rurajcunaga manami Diospa ñaupanchöga imapischu!

³Allita rurajcuna ichanga cushicuchun. Diospa ñaupancho cushisha goyächun. ¡Cushicuypita pinticachächun!

⁴Tayta Diosta alabay-llapa. Imnucunawan payta alabay-llapa. Alabay-llapa pucutay janancho aywajta. Paypa jutenga Tayta Diosmi. Paypa ñaupanchöga cushicuy-llapa.

⁵Rispitädu Wasincho tiyaj Tayta Diosga wacchacunapa papäninmi, imapitapis biyüdacunata chapajmi.

⁶Famillyaynajcunataga Tayta Dios yanapanmi juc pachacho tiyananpaj. Prësu caycajcunata jorgunmi. Nircur alliman churan. Mana wiyacoj fiyucunami ichanga chunyaj chaqui particho tiyanga.

⁷Tayta Dios, acrashayqui runacunapa ñaupanta chunyajpa shamuptiqui Selah

⁸cay pachapis sicsicyaran. Tamyapis tamyamuran. Israelcunapa Tayta Diosnin, ñaupayquichöga Sinaí jircapis sicsicyaranmi.

⁹Tayta Dios, gammi tamyata alli tamyachimurayqui. Acrashayqui chacrataga gammi allchacächirayqui.

¹⁰Chay partichönami acrashayqui runacuna tiyacaycärisha. Tayta Dios, chaychöga alli cayniquipami, pishipacushan cajta pobrita llapanta camariparayqui.

¹¹Tayta Dios, willapata willacachiran. Chaytanami achcaj warmicuna willacuran cayno:

¹²«¡Raycunaga suldäruncunawan gueshpirmi aywacurcaycan!» nir. Wasichönami warmicuna raquipänacurcaycaran guërracho contrancunata guechumushancunata:

¹³goripita cajcunata, guellaypita cajcunata. Waquin Israelcuna ichanga uywacunapa chaupinman pacacuran.

¹⁴Tayta Dios, munayniyoj raycunata gaticachashan öra gueshpejcunaga ricacuran Salmón puntaman rashta rashtaycajnömi.

¹⁵Fiyupa altumi Basán jircacunaga. Puntancunaga fiyupa altumi.

¹⁶Altu jircacuna, puntacuna ¿imanirtaj chiquir ricapanqui Tayta Dios tiyashan Sión lömata? ¡Chaychömi TAYTA DIOSGA imay-yajpis tiyanga!

¹⁷Tayta Diospa pillyapaj carrëtancunaga millunninpami. Chay carrëtancunawanmi Tayta Diosga Sinaí jircapita shamusha Sioncho caycaj Wasinman.

¹⁸Tayta Dios, prësucunata apacurcurmi janajman aywacushcanqui. Runacunanami garayniquita apapämusha-cashunqui. Mana wiyacojcunapis garayniquita apapämushurayquimi. Chaynöpami Tayta Diosga paycunawan iwal tiyanga.

¹⁹Alabasha cachun Salbacoj Tayta Diosninchëga. Paymi waran-waran yanapämanchi. Selah

²⁰Diosninchëga imapitapis salbacoj Diosmi. TAYTA DIOSGA wañunanchïpaj caycajtapis salbamashwanmi.

²¹Diosga chiquejcunapa umanta llapirengami. Juchallancho cawajcunapa ajchasapa umantapis ishcaymanmi rurarenga.

²²Tayta Diosmi nisha: «Basán puntapitapis cutichimushayquimi. Lamar yacu rurinpitapis jorgamushayquimi

²³chaquiquicunatapis chiquinacushayquipa yawarninwan pucaypa pucachinayquipaj, allguyquicunapis chay yawarta lajwananpaj» nir.

²⁴Masqui ricay, Tayta Diosnëmi wasinman yaycuycan. Rusyunchönömi raynëpa guepanta gatinaylla aywarcaycan.

²⁵Cantajcunami ñaupa-puntata aywarcaycan, guepantanami tucajcuna. Chaupintana aywarcaycan jipashcuna panderëtacunata tucaraycar.

²⁶¡Gamcunaga llapaniqui Tayta Diosta alabay! ¡Israel cajcunaga llapayqui shuntacaycur TAYTA DIOSTA alabay!

²⁷Llapanpa shullcan Benjaminpita mirajcunami ñaupa-puntata aywarcaycan, Judäpita, Zabulonpita Neftalïpita mirar aywajpa mandajnincunawan iwal.

²⁸Tayta Dios, munayniyoj cashayquita musyachicuy. ¡Ñaupata yanapämashayquino llapan ricananpaj yanapämay!

²⁹Jerusalencho Templuyquimanmi raycuna garaynincunata apamonga.

³⁰Ututucunacho tiyaj animalta piñacuy. Piñacuy röpanpa röpanpa purej fiyu törucunata, besëracunata. Manacajman churay rïcuyayllapaj wañojcunataga. Wacpa caypa mashtaypa mashtariy pillyata ashejcunataga.

³¹Egiptupitami shamonga faraonpa cachancuna. Etiopiacunami Tayta Diosta alabanga.

³²Cay pachacho mandajcunaga Tayta Diosta alabay. Alabansacunawan Tayta Diosta alabay. Selah

³³Tayta Diosga syëlupami purin. Masqui wiyay-llapa munayniyoj busnin imano wiyacämushantapis.

³⁴«Fiyupa munayniyojmi Tayta Diosga» niy. Paytaga llapan Israelcunami rispitan. Munayninmi chayan asulyaraycaj syëlucama.

³⁵Wasincho fiyupa manchanami Tayta Diosga. Acrashan Israelcunataga munayninwan yanapan. Callpayoj cananpäpis yanapan. ¡Alabasha cachun Tayta Diosga!