Read Tayta Diosninchi Isquirbichishan Salmos 69 Bible Online

Salmos 69 - Tayta Diosninchi Isquirbichishan bible

Salmos 69

¹David isquirbishan alabansa. Salbaycallämay Tayta Dios. Shengaycänami.

²Mitu sinigachöga mas rurimanmi jaticaycä. Mayman lluchcacunäpäpis manami canchu. Yacuchöga chayashcä mas rurimanmi. Bötiypa-bötiycaj yacumi apaycäman.

³Chay-jina gaparaycällar gasmashcänami. Cuncäpis nanaycannami. Tayta Diosta shuyaraycaptillänami ñawëpis chacaycanna.

⁴Imatapis mana ruraycaptillä chiquimajcunaga ajchäpitapis mas aypalla ricacusha. Chiquimajcunaga aypallami mirasha. Imatapis mana ruraycaptëmi illgächimayta yarpaycan. Mana suwapasha caycaptëmi «cutichimay» nircaycäman.

⁵Tayta Dios, gam musyanquimi löcu-jina imatapis rurashäta. Gamga musyaycanquimi juchata rurashäcunata.

⁶Llapanpaj munayniyoj TAYTA DIOS, ¡Gamman yäracamojcunaga ama pengaycho cachunchu noga llutanta rurashäpitaga! Israelcuna rispitashan Dios, ¡buluntäniquita rurajcunaga ama llaquicuchunchu noga imatapis rurashäpitaga!

⁷Ashllir-ushamaptinpis gam-raycumi awantacushcä. Pengacuyllawanmi cäräpis pucayacäcusharaj.

⁸Famillyäcunapäpis jäpami mana rejsishami cä.

⁹Rispitädu wasiqui-raycuga imamanpis chayämanmi. Contrayquicuna ashllir imata nishushayquipis nogamanmi chayamasha.

¹⁰Wagar ayunar goyaptë pengapäman.

¹¹Llaquicur gachga röpata jaticuptëpis llapanmi asipäman.

¹²Nogapäga shimillarämi rimapäcunpis. Burrächucunanami pengacachimashpan birsupäman.

¹³Chaypis, TAYTA DIOS gamllatami mañacaycämö. Yanapäcoj cashpayqui juclla salbaycamay ari. Cuyacoj cayniquipa yanapaycamay ari.

¹⁴¡Mituman jaticaycajtaga chutarcamay ari! ¡Chiquimajcunapitawan, yacu rurinpita salbaycamay ari!

¹⁵¡Jorgaycamay ari bötiypa-bötir aywaycaj yacupita! ¡Tumariycaj yacu ruriman yaycaycächimajpita jorgaycamay ari!

¹⁶TAYTA DIOS wiyaycamay ari. ¡Gamga canqui allimi, pasaypa cuyacojmi! Cuyapäcoj cashpayqui nogata ricäramay ari.

¹⁷¡Ama ñïgaycamaychu ari! ¡Juclla yanapämay ari canan ñacaycashä öra!

¹⁸Shamur salbaycamay ari. ¡Chiquimajcunapita jorgaycamay ari!

¹⁹Gamga musyanquimi ufindimashanta, pengacachimashanta, manacajman churamar ñacachimashanta. Gam musyaycanquimi chiquimajcuna pï cashantapis.

²⁰Gayapämashpanmi shongötapis fiyupa jagayächisha. ¡Gänasnëpis ni callpäpis manami cannachu! Yangami ashishcä cushicachimänanpaj, cuyapämänanpäpis.

²¹Ichanga micuynëmanmi benënuta wiñasha. Yacunaptëpis binagritami upuchimasha.

²²Cananga quiquincuna alli micuyta micunanpaj shuntacashan cachun achäqui mana alliman chayananpaj.

²³Ñawincunapis chacacäcuchun mana ricananpaj. Imaycamapis chancancuna chucchuchun.

²⁴Rabyayquita paycunacho pascacächiy. ¡Fiyupa rabyaycashayqui paycunaman chayachun!

²⁵Tiyaycashanpis chunyaj ricacuchun. Tiyashan tolducunachöpis ama pipis tiyachunnachu.

²⁶Paycunaga llaquicaycächishayqui runatami gaticacharcaycan. Paycunaga ñacaycächishayqui runatami manacajman churaycäman.

²⁷Mana allita rurajcunataga mana alliman chayachiy. ¡Paycunataga ama perdunaypischu!

²⁸¡Imaycamapis cawananpaj apuntaraycächishayqui librupita illgarachiy! ¡Alli rurajcunapa jutin apuntaraycashan librumanga ama apuntaynachu!

²⁹Tayta Dios, nogataga gueshyaycajta, llaquicuycajta allchacaycachimay, salbaycamay ari.

³⁰Tayta Diosnëtaga alabansacunawanmi alabashaj. Agradësicurmi alabashaj.

³¹Chayno alabaptë, töruta car nubilluta car wagrantinta shilluntinta garashäpitapis masrämi cushiconga.

³²Chayta ricar ñacarcaycaj pobricunaga fiyupami cushiconga. Dios munashanno goyajcunapis cushishami goyangapaj.

³³TAYTA DIOSGA wiyanmi pobricuna mañacushanta. Manami cachaycunchu prësu caycajcunataga.

³⁴¡Llapan cawajcunapis, syëlupis, cay pachapis, lamarpis Tayta Diostaga alabay!

³⁵Tayta Diosga Judá particho caycaj siudäcunata yapaymi allchachenga. Yapaymi acrashan runacunataga Sioncho tiyachenga.

³⁶Tayta Diosta sirbejcunapa wamrancunami quëdanga chay siudäwanga. Chaycho tiyashpanmi paycunaga raquipänaconga. Diosta cuyajcunami chaychöga tiyanga.