Read Tayta Diosninchi Isquirbichishan Salmos 7 Bible Online

Salmos 7 - Tayta Diosninchi Isquirbichishan bible

Salmos 7

¹Benjamín casta runa Cuspa shiminpita David llaquicur cantashan. TAYTA DIOS, gammanmi pacacuyta ashë. ¡Gaticachämajcunapitaga salbaycamay!

²Liyuncunanömi carcaycan. Capaschari rachir-usharamanmanpis. Gam mana salbamaptiqui jucga manami salbamangachu.

³TAYTA DIOS, ¿ima mana allitataj rurashcä? ¿Imachötaj juchallicushcä?

⁴¿Allita ruramajcunatachuraj mana alliwan cutichishcä? Manacajllapitachuraj conträta ¿mana allita rurashcä?

⁵Chayno rurasha captëga chiquimajcuna gaticachämächun. Taripaycamar garachasha apamächun. Pasaypa pengayman churamächun. Selah

⁶¡TAYTA DIOS! ¡Chiquimajcunawan rabyasha pillyay ari! ¡Alli arriglanayquipaj nisha caycarga faburnë jatariy ari Tayta Dios!

⁷Intëru nasyuncunapitapis ñaupayquiman shamuchun. Paycunata jusganayquipaj sillunniquiman jamacuy.

⁸TAYTA DIOS, gammi jusganqui llapan runacunata. Imano cashätapis jusgamay. Nogaga manami ima mana allitapis rurashcächu.

⁹Juchaynaj Tayta Dios, gamga musyaycanquimi runa imano yarpaycashantapis. ¡Fiyu runacunataga illgächiyna ari! ¡Juchaynaj runata ichanga yanapaycuy ari!

¹⁰Nogata imapitapis chapämäga janajcho caycaj Tayta Diosmi. Paymi alli runacunataga salban.

¹¹Tayta Diosga alli arriglaj juezmi. Payga mana jananpaypami jucha rurajcunata imaypis jusgan.

¹²Fiyu runacuna mana arpinticuptenga Tayta Dios sablintami afilanga, lëchantami camarenga.

¹³Nina ratataycaj lëchawanpis apuntaraycanmi. Wañuchicoj armanpis camarishallanami caycan.

¹⁴Masqui ricay fiyu runata: Juchallatami gueshyaj caycan. Mana allicunallatami gueshyaj caycan. Wachangapis llullacuyllatami.

¹⁵Fiyupa jatun ruri uchcutami rurasha. Quiquin rurashan uchcullamanmi yaganga.

¹⁶Mana allita rurashancunapis quiquillanmanmi chayanga.

¹⁷Nogaga TAYTA DIOSTAMI agradësicushaj alli arriglaj cashanpita. Janajcho caycaj TAYTA DIOSTAMI alabansacunawan alabashaj.