Read Tayta Diosninchi Isquirbichishan Salmos 71 Bible Online

Salmos 71 - Tayta Diosninchi Isquirbichishan bible

Salmos 71

¹TAYTA DIOS, gamllamanmi guellicamö. ¡Ama pengaychöga cachaycamaychu!

²Tayta Dios, allita rurajmi canqui. Salbaycamay ari. Wiyaycallämay, yanapaycallämay ari.

³Gammi canqui gaganöpis chapämajnë. Gammi canqui pacacuna siudä, salbamajnë. Chaymi gamllaman guellicamö.

⁴Tayta Dios, pacaycamay ari mana alli runacunapita, wañuchicoj runacunapita, fiyu runacunapita.

⁵TAYTA DIOS gammanmi mösu cashäpita-pachapis yäracaycämö. Gammi imapitapis chapämashcanqui.

⁶Mamäpa pachancho caycashpallänami gammanga yäracaycämurä. ¡Gammi yurichimarayqui! ¡Imaypis gamllatami alabaycäshayqui!

⁷Achcajmi nogata ricamar almirasha. Ichanga gammi nogataga chapämarayqui.

⁸Goyay goyaypis gamta alabaycällarmi goyä.

⁹Auquinna captëga ama gongaycamaychu. Callpaynaj captëga ama cachaycamaychu.

¹⁰Wañuchimayta munajcunaga achcaj shuntacaycärirmi conträ parlacusha.

¹¹Paycuna ninacun: «Gaticachashpayqui chariy. Diosga cachaycushanami. Manami pipis salbangachu.»

¹²Tayta Dios, ama witicuychu nogapitaga. ¡Juclla aywaycamuy yanapämänayquipaj!

¹³¡Nogata chiquipämajcunaga quiquincuna pengayman chayachun, illgächun! ¡Noga mana alliman chayanäta munajcunataga quiquincunata mana alli chayachun!

¹⁴Nogaga gamllatami shuyaraycäshayqui. Waran-waran gamllatami alabashayqui.

¹⁵Goyay-goyay pï-maytapis willacushaj alli ruraj cashayquita, nogacunata salbamashayquita. Ichanga willapaytapis manami ushämanchu.

¹⁶TAYTA DIOS nogaga willacushämi fiyupa allicunata rurashayquita. «Dios japallanmi juchaynäga» nirmi willacushaj.

¹⁷Tayta Dios, mösu cashäpita-pachami gamga willapämashcanqui. Canancamapis fiyupa allita rurashayquitami willacuycä.

¹⁸Ama cachaycamaychu ari auquinna captëpis soguna captëpis. Nogaga mastarämi willacunä caycan munayniyoj cashayquita canan caycaj runacunata, paycunapa wamrantapis.

¹⁹Tayta Dios, alli ruraj cashayquega chayan janaj syëlucamami. Gamga rurashcanqui almiraypajcunatami. ¡Manami pipis tincunchu gammanga!

²⁰Gamga fiyupa ñacayman llaquicuymanmi chayachimashcanqui. Chaypis yapaymi cawachimanquipaj. Allpa rurinpitapis yapaymi jatarachimanquipaj.

²¹Nircorga masnami munayniyojyächimanquipaj. Yapaymi cushicachimanquipaj.

²²Tayta Diosnë, nogaga alli cashayquipitami alabashayquipaj. Israelcunapa Santo Diosnin captiquimi alabansacunata cantashaj arpacunata arpa-mallwacunata tucashpä.

²³Gam salbamashayquipitami cushicur cantashaj.

²⁴Mana alliman chayanäta munajcunaga fiyupa pengaypämi cananga carcaycan. Chaymi gam alli jusgaj cashayquitaga imay örapis parlaycäshaj.