Read Tayta Diosninchi Isquirbichishan Salmos 72 Bible Online

Salmos 72 - Tayta Diosninchi Isquirbichishan bible

Salmos 72

¹Salomón isquirbishan alabansa. Tayta Dios, raytaga sumaj yachachiy alli arriglananpaj. Raypa wamrantapis yanapaycuy allita rurananpaj.

²Chayrämi rayga umildicunata, pobricunata alli mandanga.

³Chauraga jircacunapis acrashayqui runacunata cuydanga. Puntacunapis acrashayqui runacunata alli ricanga.

⁴¡Rayga alli arriglachun pobricunataga! ¡Muchupacajcunapa wamrancunata salbachun! ¡Ñacachejcunata ichanga ñacachichun!

⁵¡Intipitawan quillapitapis mas unaycamaraj acrashayqui rayga cawachun! ¡Achca miraycama cawachun!

⁶¡Payga cachun cay pachaman tamyar guewacunata pargojno!

⁷¡Pay mandaptenga llapan rurashancunapis alli llojshichun, alli goyaylla cachun! ¡Quilla cawashanpitapis mas unaycamaraj alli goyaylla cachun!

⁸¡Payga mandachun jatun lamarpa cuchunpita Cachi lamarcama! Éufrates mayupitana mundupa jucaj cuchuncama mandachun.

⁹Payta chiquej chunyajcho tiyajcunaga paypa munayninchöna ricacuchun.

¹⁰¡Paymanga Tarsischo tiyaj raycuna, lamar chaupin tishgucho tiyajcuna impuestuta pägachun! ¡Garaynincunata goycuchun Sabächo caycaj raycuna, Sebacho caycaj raycuna!

¹¹¡Llapan raycuna gongurpacuchun paymanga! ¡Llapan nasyuncho tiyajcuna sirbichun!

¹²Payga salbangami ruwacoj caj pobricunata, mana pipis yanapänanpaj cajcunatapis.

¹³Umildicunataga cuyapangami. Wañunanpaj caycaj pobricunatanami salbanga.

¹⁴Paycunataga munayniyojcunapita, fiyu runacunapita salbangami. Paycunaga raypa ñaupancho bälinmi.

¹⁵¡Chayno alli cashanpita rayga cawachun! ¡Sabächo caj gorita goycuchun! ¡Paypäga imaypis Diosta mañacuycäshun! ¡Paytaga bindisyunta gochun imaypis!

¹⁶¡Cay nasyunchöga rïgu amatar wayuchun! ¡Intëru jircacunachöpis juntasha cachun! Libanuchöno rïgucuna wiñachun. Runacunapis aypalla mirachun jirca jachacunanöraj cananpaj.

¹⁷¡Ray alli cashanpita jutintaga imaycamapis rimaycächun! Chaynölla parlachun inti cashanpitapis mas unaycamaraj. ¡Munducho caycaj nasyuncunapis pay-raycu bindisyunta chasquichun! ¡May nasyuncho tiyajcunapis rayta «alli goyaycullay» nichun!

¹⁸Israelcuna rispitashan TAYTA DIOS alabasha caycullay. Gamllami ima-aycatapis almiraypajcunata ruranqui.

¹⁹Tayta Diosga imaycamapis alabasha caycuchun. ¡Cay pachachöga intërucho paylla rejsisha cachun! ¡Chayno caycuchun!

²⁰Isaïpa wamran David Tayta Diosta mañacur alabashanga cayllachönami ushan.