Read Tayta Diosninchi Isquirbichishan Salmos 73 Bible Online

Salmos 73 - Tayta Diosninchi Isquirbichishan bible

Salmos 73

¹Asaf isquirbishan alabansa. Tayta Diosga fiyupa allimi Israelcunapäga, alli shongu cajcunapäga.

²Nogami ichanga jucha rurayta yarpaycaräna. Ichicllanami pishisha jucha rurayman chayanäpaj.

³Nogaga fiyupami charayta munaparä alli-tucojcuna charashanta. Fiyu runacuna alliman chayaptin pasaypami chiquiparä.

⁴Fiyu runacunaga allimi goyan. Manami gueshyanpischu. Chaymi wañuypäpis mana yarpachacunchu.

⁵Manami ñacanpischu waquin runacunanöga. Manami waquinnöga ima ñacaychöpis cashachu.

⁶Chaymi alli-tucushanga wallganno camaraycächin. Mana allita rurashancunapis röpannömi caycan.

⁷Mana allita rurananpaj yarpashanga cäranchömi rejsicaycan. Wera caywanmi ñawinpis ñipchicashallana caycan.

⁸Runacunapa washan riman. Llapan runatami cushipan. Fiyupa alli-tucushpan paycunaga pitapis mana allita rurayta munarcaycan.

⁹Tayta Diospa contranmi riman. Runacunapapis washantami riman.

¹⁰Chayno captinmi chay fiyu runacunataga alaban. Ima nishancunatapis riguin.

¹¹Paycunaga nin: «¿Imanöpataj Diosga musyanga? ¿Imanöpataj janajcho caycäga musyanga?» nir.

¹²Chaynömi Tayta Diosta mana rispitajcunaga. Mana ñacayllapami ima-aycatapis tarin.

¹³Noga alli shongu cashäga yangami. Yangami witicushcä mana allicunapitapis.

¹⁴Chaycunapaj yarpachacurmi nogaga imay örapis llaquicuycä. Cada tutami ñacä.

¹⁵Noga paycunano yarpashpäga maynami engañäman caran acrashayqui runacunatapis.

¹⁶Yarpachacaycächimashayquitaga llapantami tantiyayta munashcä. Ichanga nogapaj fiyupa sasami casha.

¹⁷Tayta Diosta rispitana wasiman yaycunäcama manami tantiyashcächu. Yaycur-rämi paycuna imano ushacänanpaj cashantapis tantiyacushcä.

¹⁸Paycunataga pasaypa llushcamanmi chayachishcanqui. Chaypitami tangariycunqui quiquincunalla mana alliman chayananpaj.

¹⁹¡Illajpitami ushacanga paycunaga! ¡Fiyupa mancharirmi ushacanga!

²⁰Tayta Dios, fiyu runacunataga juc runa suyñushanta gongaycojnömi pï-maypis gongayconga.

²¹Tayta Dios, nogaga fiyupami rabyasha caycarä. Shongöpis nanayparämi nanaycaran.

²²Pasaypa mana tantiyaj runami cashcä. ¡Ñaupayquichöga caycarä juc animalnömi!

²³Imano captëpis simrimi yanapaycämarayqui. Derëchu caj maquëpita charirajnömi yan'gaycämarayqui.

²⁴Willapämashpayquimi sumaj yachachimashcanqui. Nircurnaga allimi chasquimanquipaj.

²⁵¿Pïnëtaj nogapaga syëlucho caycan? ¡Gamllami Tayta! Yanapaycämaptiquega manami imatapis munächu cay pachachöga.

²⁶Callpäpis manami cajnönachu. Chaypis gamllami imaypis yanapaycämanqui. ¡Gamllami nogataga balurta goycämanqui!

²⁷Gamta gongaycushoj cajcunaga llapanmi illganga. Mana wiyacushojcunataga illgarachinquipämi.

²⁸Nogami ichanga Diospa ñaupallancho cawayta munä. Chay cajmi nogapäga mas alli caycan. TAYTA DIOS gammi caycanqui pacacunä. Chaymi gam rurashayqui cajtaga llapanta willacushaj.