Read Tayta Diosninchi Isquirbichishan Salmos 77 Bible Online

Salmos 77 - Tayta Diosninchi Isquirbichishan bible

Salmos 77

¹Jedutún cantashan. Asaf isquirbishan alabansa. Tayta Diostami sinchi gaparaypa mañacö pay wiyamänanpaj.

²Llaquisha caycashä öra Tayta Diosta mañacö. Chacaycuna mañacushpä mana jamaypami maquëcunata jogarirä. Chayno mañacuptëpis manami cushicachimannachu.

³Tayta Diosta yarpärishpäga wagämi. Yarpachacushpä manami ima ruraytapis camäpacöchu. Selah

⁴Tayta Dios, manami puñuchimanquipischu. ¡Imata yarpachacurpis manami imata niytapis puydëchu!

⁵Ñaupa watacunapaj, unaycunapaj yarpärë.

⁶Chacaycuna alabashäta yarpärë. Chaymi shongullächo yarpachacurir në:

⁷«Tayta Diosga ¿chaynöllachuraj rabyasha caycanga? ¿Mananachuraj yapayga alli ricamäshun?

⁸¿Cuyacoj caynin ushacäcushanachuraj? Aunishantaga ¿mananachuraj imaypis cumlenga?

⁹¿Cuyapäcoj cashanta Tayta Diosga gongaycushachuraj? ¿Fiyupa rabyasha cashpan mananachuraj cuyapämäshun?» nir. Selah

¹⁰Yapay në: «Fiyupa llaquicö Tayta Dios noganchïta unaynöga manana ricamashami» nir.

¹¹Unay watacunacho Tayta Diosninchi almiraypajcunata rurashallantami yarparäshaj.

¹²Unaycuna milagrucunata rurashallanpaj yarpachacushaj.

¹³Tayta Dios, gamnöga manami juc canchu. Gam rurashayquega llapanpis allillami.

¹⁴¡Tayta Dios, gammi fiyupa almiraypajcunata ruranqui! ¡Llapan nasyuntami musyachishcanqui munayniyoj cashayquita!

¹⁵Munayniquiwanmi jorgamushcanqui acrashayqui runacunata. Paycunaga Jacobpitawan wamran Josëpita mirar aywajcunami. Selah

¹⁶Tayta Dios, lamar yacupis ricashushpayquega fiyupami cuyuriran. Mas jundunnin yacupis cuyuriran.

¹⁷Pucutaypitapis tamyami shicwamuran. Räyupis janajchömi pashtasha. Intërupami illgushapis.

¹⁸Shucucuy wayracho räyuyqui pashtashanpis wiyacashami. Illguyniqui achicyashpanmi intëru mundutapis achicyachin. Cay pachapis timlurcunawan cuyuriran.

¹⁹Lamar gochapami nänita rurarirayqui. Aypalla yacu jananpami aywarayqui. Ichanga yupiquita manami pipis tariranchu.

²⁰Acrashayqui runacunataga uyshata gatejnömi pusharayqui. Moiseswan y Aaronwanmi pushachirayqui.