Read Tayta Diosninchi Isquirbichishan Salmos 80 Bible Online

Salmos 80 - Tayta Diosninchi Isquirbichishan bible

Salmos 80

¹Asaf isquirbishan alabansa. Israelcunata ricaj Tayta Dios wiyaycamay ari. Gamga Josëpita mirajcunata uyshëru uyshanta pusharajnömi pushanqui. Gampaga jamanayquipis caycan querubín anjilcuna caycashanchömi.

²Achicyaypa achicyar yurircushpayqui washaycuy Efrainpita, Manasespita, Benjaminpita mirajcunataga. ¡Munayniquiwan nogacunata salbaycamay ari!

³Tayta Dios, ñaupatano alli goyänäcunapaj yanapaycamay. Alli ñawillayquiwan ricäramay ari salbasha canäcunapaj.

⁴Israelcuna mañacuycäshuptiquipis ¿imaycamaraj rabyashalla caycanqui munayniyoj TAYTA DIOS?

⁵Chay-jina wagayllawan weguillätanami upuycäpis. Pasaypa wagashä weguillänami yacöpis.

⁶Nogacunataga cachaycamashcanquimi bisïnöcuna manacajman churamar cushipämänanpaj, chiquimajcunapis asipämänanpaj.

⁷Munayniyoj Tayta Dios, ñaupatano alli goyänäcunapaj yanapaycamay ari. Alli ñawillayquipa ricäramay ari salbasha canäcunapaj.

⁸Egiptupitami übas lantata apamurayqui. Mana rispitashojcunataga chacrapita jitarishcanqui chay übasta lantanayquipaj.

⁹Chacrata sumaj picharcurmi lantashcanqui. Lantanami sapichar intëru nasyunman juntasha.

¹⁰Puntacunatapis chapasha llantupänanpaj. Rämancunapis sedrucunata chapasha.

¹¹Räman lätar aywajcunaga chayasha Mediterráneo lamarcamami, inti yagamunan caj-läpanami Éufrates mayucama.

¹²Cananga ¿imanirtaj guenchancunata tunichishcanqui? Päsaj fiyu runacunapis wayuyninta pallacurcaycanmi.

¹³Munti cuchicunapis pedäsumi ruraycan. Jirca animalcunapis ushacurcun.

¹⁴Munayniyoj Tayta Dios cutiycamuy ari. Übas lantayquitaga syëlupita-pacha sumaj ricaycuy.

¹⁵Chay übastaga quiquiquimi lantarayqui. Chillguiptenga quiquiquipaj cananpämi ricarayqui.

¹⁶Übasniquega mutur-ushashami, rupachir-ushashami caycan. Chaymi chayno rurajtaga fiyupa castigaycuy ari.

¹⁷Munashayquino cawaj runata ichanga yanapaycuy. Acrashayqui runataga sumaj yanapaycuy.

¹⁸Chauraga mananami nogacuna imaypis gongashayquipänachu. Cawachimay ari gampa jutillayquitana rimanäpaj.

¹⁹Munayniyoj TAYTA DIOS, ñaupatano alli goyänäcunapaj yanapaycamay. Alli ñawillayquiwan ricäramay ari salbasha canäcunapaj.