Read Tayta Diosninchi Isquirbichishan Salmos 83 Bible Online

Salmos 83 - Tayta Diosninchi Isquirbichishan bible

Salmos 83

¹Asaf isquirbishan alabansa. Tayta Dios, ¡ama upällallaga cacuychu! ¡Mana cuyucuypa, mana rimacuypaga ama cacuychu!

²Chiquishojcunata masqui ricay: imanöshi gayapaycäshunqui. Contrayquicunata masqui ricay: gaparpashpan imanöshi washayquita rimarcaycan.

³Acrashayqui runacunata mana allita rurananpämi parlacurcaycan.

⁴Paycunaga nircaycan: «¡Paycunata illgarachishun manana nasyun cananpaj! ¡Israelpa jutintaga pipis manana yarpänanpaj illgarachishun!» nir.

⁵Llapanmi parlacusha gampa contrayqui. Juc shongullami parlacusha:

⁶Edom runacuna, Ismaelcuna, Moab runacuna, Agar runacuna,

⁷Gebalpita, Amonpita, Amalecpita mirajcuna, Filistea runacuna, Tirocho tiyajcunapis.

⁸Asiriocunapis paycunamanmi guellicusha. Asiriocunaga Lotpita mirajcunata pillyäshejcunami. Selah

⁹Paycunata wañurachiy Madián runacunata wañuchishayquino. Paycunataga ushariy Sisarata, Jabinta Cisón mayu läduncho wañuchishayquino.

¹⁰Paycunataga illgächirayqui Endorchömi. Chauraga chullpamanna ticraran.

¹¹Mandajnincunatana wañuchiy Orebta, Zeebta wañuchishayquino. Llapan raycunatana wañuchiy Zebata, Zalmunata wañuchishayquino.

¹²Paycunaga «Dios goycushan chacrata charicarcärishun» niran.

¹³Tayta Diosnillä, camacaycachiy ari chaquisha öjata wayra apacushanno ricacunanpaj.

¹⁴Imanömi muntita nina rupar ushacurcun, imanömi jircapa nina ichircur-ichircur aywan

¹⁵chayno ricacunanpaj löcu tamyawan gaticachay, löcu wayrawan manchachiy.

¹⁶¡TAYTA DIOS paycunataga fiyupa pengacachiy gamman yäracamunanpaj!

¹⁷Imaycamapis pengaycho cachun. ¡Chayno caycällarmi paycunaga wañongapis!

¹⁸Llapan musyachun gam japallayqui TAYTA DIOS cashayquita. Tantiyacuchun gamlla janaj pachacho cay pachachöpis Tayta Dios cashayquita.