Read Tayta Diosninchi Isquirbichishan Salmos 89 Bible Online

Salmos 89 - Tayta Diosninchi Isquirbichishan bible

Salmos 89

¹Ezraíta runa Etán yachachir isquirbishan. TAYTA DIOS, cuyapäcoj cashayquipitami imaypis alabashayqui. Imaypis willacushämi llapanta cumlej cashayquitaga.

²Nogaga willacushaj wasipa alli simintunnöpis imaycamapis cuyacoj cashayquitami. Gampa palabrayquega syëlu imaypis mana rucaj cashannömi.

³Davidwanpis allimi parlacurayqui. Acrashayqui sirbishojniquitami aunirayqui:

⁴«Nogami camacächishaj gampita mirajcuna imaycamapis ruquiqui mandaj cananpaj» nir. Selah

⁵TAYTA DIOS, janaj pachacho caycajcunami alabashunqui llapanta cumlej cashayquipita, milagrucunata rurashayquipitapis.

⁶¡Manami ima diospis, ni syëlucho caycajcunapis gammanga tincunchu!

⁷Janaj pachacho llapan shuntacasha caycashanchöpis gamtaga manchacushunquimi. Anjilcuna tumaparaycäshushayquichöpis gamga canqui fiyupa manchacuypaj munayniyojmi.

⁸Ima-aycapäpis munayniyoj TAYTA DIOS ¿piraj gammanga tincunman? Gamllami rasunpa cajtapis ruranqui; munayniyoj canqui.

⁹Bötiypa bötiycaj lamarta gammi chawächinqui. Wayrawan pullchajyaycajtapis chawächinqui.

¹⁰Lamarcho manchacuypaj caycaj waräcuytapis wañusha runatanöllami ñitirishcanqui. Chiquishojcunatapis munayniquiwanmi mashtaypa mashtarishcanqui.

¹¹Syëlupis cay pachapis gamllapami. Gammi camashcanqui mundutapis, munducho caycajcunatapis.

¹²Mundutaga juc cuchunpita jucaj cuchuncama gammi camashcanqui. Tabor puntawan Hermón puntapis cushishami gamta alabashunqui.

¹³Gamga munayniyojmi canqui. Gampa maquiquega llapanta binsinanpaj fiyupa callpayojmi.

¹⁴Gam mandashpayquega allitami ruraycanqui, rasun cajtami ruraycanqui. Cuyacoj cashayquitami nogacunata musyaycächimanqui.

¹⁵Cushishami cawanga alabashojcunaga, gampa ñaupayquicho purejcunaga.

¹⁶Paycunaga jutiquita parlashpan cushisha goyan. Allita ruraj cashayquipitapis cushicuchun.

¹⁷Chayno goyanga munayniyoj cananpaj rispitasha cananpaj yanapaptiquimi. Gam cuyacoj cashpayqui yanapämaptiquimi nogacuna munayniyoj cashaj.

¹⁸¡TAYTA DIOS, gammi canqui chapacuna escüdö! ¡Israelpa Santo Diosnin, gammi canqui nogacunapa raynë!

¹⁹Unayga acrashayqui runacunata ribilaypami tantiyachirayqui. Paycunatami nirayqui: «Israel runacunapitami jinyunninta acrashcä. Paytaga nogami yanapashcä mas allicho cananpaj.

²⁰Sirbimaj Davidtami acrashcä. Ray cananpämi rispitädu asëtita umanman wiñapashcä.

²¹Paytaga imaypis yanapäshämi. Munaynëwanmi sumaj callpayojyächishaj.

²²Chiquejcunapis manami magangachu. Fiyu runacunapis manami binsengachu.

²³Payta chiquejcunataga llapirishämi. Chay runacunataga ichic-ichicllami rurarishaj.

²⁴Paytaga yanapaycäshämi. Aunishätapis cumlishämi. Yanapaptëmi mas munayniyoj ricaconga.

²⁵Mediterráneo lamarpita Éufrates mayucama mandananpämi camacächishaj.

²⁶Paymi nimanga: ‹Gammi papänë canqui. Diosnë canqui, Salbamaj, imapitapis chapämaj canqui› nir.

²⁷Nogapapis payga guechpa wamrämi canga. Payga cay pachacho caj raycunapita mas munayniyojmi canga.

²⁸Paytaga imaypis chaynöllami cuyaycäshaj. Paywan parlacushätaga manami imaypis rucachishächu.

²⁹Syëlu manaraj ushacashancamaga paypita mirar aywajcuna imaypis mandaycangami.

³⁰«Yachachishäta paycuna gongaycuptin, imanöpis rurananpaj nishäno mana ruraptin,

³¹laynëta mana cumliptin, mandamintöcunata mana wiyacuptin

³²castigashaj gueruwan wiruypapis mana wiyacamashanpita, mana allicunata rurashanpita.

³³Chaypis Davidtaga mana cachariypami cuyaycäshaj. Paypaj imata aunishätapis manami cutiricushächu.

³⁴Paywan parlacushätaga manami rucachishächu. Palabrätaga cumlishämi.

³⁵Davidtaga aunishcä jutëcho jurarmi. Paytaga manami llullapäshächu.

³⁶Paypita mirar aywajcunaga imaypis mandaycangami. Inti caycashancamaga mandaycangami.

³⁷Mandaj cashanga canga quillano. Mana illgaypami mandaycanga syëlu manaraj ushacashanyäga.» Selah

³⁸Chayno aunisha caycashpayquipis manacajmanmi churashcanqui acrashayqui raytaga. Paypäga fiyupami rabyacurcushcanqui.

³⁹Umancho caycaj corönantapis pampamanmi jitarishcanqui. Sirbishojniquiwan alli parlacushayquitapis manami cumlishcanquichu.

⁴⁰Siudänincunapa curralnincunatapis gashargärishcanquimi.

⁴¹Pï-maypis chaypa päsajcunaga munashantami suwapan. Läduncho tiyajcunapis asipan.

⁴²Davidta chiquejcuna callpayoj cananpämi yanapashcanqui. Chaymi binsisha. Cananga chiquejcuna cushisha carcaycan.

⁴³Raypa fïnu sablin caycajcunatapis ronguyächishcanqui. Pillyachöpis mananami yanapashcanquichu.

⁴⁴Munayniyoj caynintami guechushcanqui. Sillunnintapis jitarishcanqui.

⁴⁵Mösu cashan timpupis manami alliga cawachishcanquichu. Pasaypami pengacachishcanquipis. Selah

⁴⁶TAYTA DIOS, ¿imaycamaraj pacaräcunqui? ¿Fiyupa rabyasha caycashayqui manachuraj päsanga?

⁴⁷Tayta Dios, yarpäriy ari noga päsacojlla cashäta. Runacunaga yupasha watallami cawä.

⁴⁸Manami pipis canchu mana wañöga. Sepultürapitaga manami pipis gueshpinchu. Selah

⁴⁹Tayta Dios, ¿maytaj ñaupata cuyacoj cashpayqui sirbishojniqui Davidta aunishayquega?

⁵⁰Tayta Dios, wiyaycuy ari. Sirbishojcunataga achcaj runami asiparcaycan. Imano gayapashancunatapis shongullächömi yarparaycä.

⁵¹TAYTA DIOS, chiquishojcunaga asipaycämanmi. Imay örapis gayaparcaycämanmi gam acrashayquicunataga.

⁵²TAYTA DIOSGA imaycamapis alabasha cachun. ¡Chayno cachun!