Read Tayta Diosninchi Isquirbichishan Salmos 90 Bible Online

Salmos 90 - Tayta Diosninchi Isquirbichishan bible

Salmos 90

¹Diosta sirbej Moisés mañacushan. Tayta Dios, unaypita-pachapis gamllami pacacunä cashcanqui.

²Puntacunapis manaraj cashanpita-pacha, cay pacha manaraj cashanpita-pacha, unaypita-pacha imaycamapis gamllami canqui Tayta Diosga.

³«Runacuna allpaman ticrachun» niptiquega runacunapis allpamanmi ticran.

⁴Gampäga waranga wata caycan ganyan junaj cashannöllami, chacaypa juc ishcay öra cashannöllami.

⁵Illajpitami runacunataga gam apacunqui. Suyñushancuna illgashannöllami runacunataga illgächinqui.

⁶Nogacunaga caycä guewa wiñarcamur, tutapaj waytaraycar warämur tardipaga wañuytar chaquicäcojnöllami.

⁷Gam rabyashayqui nogacunata ushaycämanmi. Llutäpacashanami ricacöcunapis.

⁸Mana allita rurashäcuna, juchata rurashäcuna gampa ñaupayquichöga llapanmi musyacaycan.

⁹Rabyacurcuptiquega nogacuna usharaycämi. Jämayta cacharcuynöllami watäcunapis päsacurin.

¹⁰Ganchis chunca (70) watayajllanami cawäcuna. Sinchinnin cajcunallami chayan pusaj chunca (80) watayojcama. Chayno cawashpäcunapis cawäcuna ñacallar, arullar. Watäcunapis manapis aycällatami päsarin. Nogacunapis chachayacäcöna.

¹¹Rabyar imano cashayquitapis manami pipis musyanchu. Chayno nogacunapis manami musyäcunachu gamta imano manchacuna cashantapis.

¹²Chaymi Tayta Dios yachaycachimay imano goyänäpäpis. Yachacunäpäpis yarpayta goycamay.

¹³TAYTA DIOS, ¿imaycamaraj mana yarpämanquichu? Nogacunata yarpaycamayna. Gam acrashayqui caycaptëga nogacunata cuyapaycamay ari.

¹⁴Pacha warashan öraga cuyamashayquita musyachimay. Chaura cawashäcama cushisha alabashayqui.

¹⁵Llaquicur goyashä watamanno cushisha goyänäpäpis cawaycachimay.

¹⁶Camacaycachiy ari Tayta Dios sirbishojcunapis wamrancunapis rurashayquicunata y alli cashayquita ricananpaj.

¹⁷Tayta Dios nogacunata musyaycachimay cuyacoj cashayquita. Aruynëcunamanpis bindisyunniquita churaycuy. Bindisyunniquita churaycuy ari aruynëcunamanga.