Read Tayta Diosninchi Isquirbichishan Salmos 91 Bible Online

Salmos 91 - Tayta Diosninchi Isquirbichishan bible

Salmos 91

¹Janajcho caycaj Tayta Diospa maquincho goyaycaj runataga Munayniyoj Tayta Dios chapanga.

²TAYTA DIOSTA mañacurmi nishaj: «Tayta Dios, gammi pacacunä canqui. Gammi callpayojyächimanqui. Gammanmi yäracö» nir.

³Tayta Diosllami salbashunquiman mana allicunaman chayanayquipita. Wañuchicoj gueshyacunapitapis chapäshunquimanmi.

⁴Paymi älancunawan chapashunquipaj. Älan rurincho carnaga mananami manchacunquipänachu. Payga imaypis escüdunömi chapaycäshunquipaj.

⁵Chacaypa imata mayarpis ama manchacuychu. Junajpa lëcha janayquipa päsaptinpis ama manchacuychu.

⁶Chacaypa gueshya chariptinpis ama manchacuychu. Junajpa murti puriptinpis ama manchacuychu.

⁷Ichoj caj-läduyquicho capas wañonga waranga. Derëchu caj-läduyquicho capas wañonga chunca waranga. Gamtami ichanga mana imapis päsashunquipächu.

⁸Quiquiquimi ñawiquiwan ricanquipaj fiyu runacunata castïgu chayajta.

⁹Pacashunayquipämi TAYTA DIOSMAN gamga yäracushcanqui. Paymanmi yäracushcanqui imapitapis chapäshunayquipaj.

¹⁰Chaymi mana chayashunquipächu ima mana allipis. Famillyayquicunatapis gueshya manami charengapächu.

¹¹Quiquin Tayta Diosmi anjilnincunata cachamonga ima-aycapitapis cuydashunayquipaj.

¹²Anjilcunami janajllapa apashunquipaj imamanpis mana tacacänayquipaj.

¹³Liyuncuna caycashanpa, waräcuy caycashanpa, culebracuna caycashanpapis purinquipämi. Chaycunataga lluchcargärinquipämi.

¹⁴Tayta Diosmi nin: «Cuyamaj runataga nogapis salbashämi. Rejsimaj runataga nogapis pushashaj pipis mana chayananmanmi.

¹⁵Gayacamaptenga yanapäshämi. Sasa goyaycunachöpis quiquëmi paywan caycäshaj. Llaquicuycunapitapis jorgushämi. Nircurnami rispitädu cananpaj churashaj.

¹⁶Unaycamami cawachishaj. Noga salbacoj cashäta musyachishaj.»