Read Tayta Diosninchi Isquirbichishan Proverbios 1 Bible Online

Proverbios 1 - Tayta Diosninchi Isquirbichishan bible

Proverbios 1

¹Israelpa raynin Davidpa wamran ray Salomón rimashanmi cay rimaycunaga.

²Cay rimaycunataga isquirbisha: Chayta yachacur runacuna yachaj cananpämi, yarpaysapa cananpämi, yachaj runacuna parlashanta tantiyacunanpämi,

³willapashancunata chasquicunanpämi, quiquin tantiyacunanpaj, allillata rurananpaj, furmal cananpaj;

⁴mana yarpachacoj mösucunata tantiyachinanpaj, yarpaysapa cananpaj.

⁵Yachajcunapis, yarpaysapacunapis cay rimaycunata wiyarga masmi yachacun.

⁶Chauraga tantiyanmi yarpaysapacuna parlashanta, adibinansancunata, willapancunata.

⁷Rasunpa yachaj canapäga rimëru TAYTA DIOSTAMI rispitar yäracuypaj. Tantiyacuyta mana munajcunami ichanga alli yachachicuycunatapis, willapashancunatapis manacajman churan.

⁸Ïju, taytayqui willapäshushayquita sumaj wiyacuy. Mamayqui tantiyachishushayquitaga ama gongaychu.

⁹Chay willapäshushayqui, chay tantiyachishushayqui gampäga canga cuyayllapaj adurnunömi.

¹⁰Ïju, juchasapacuna juchata rurachiyta munashuptiqui ama ruranquichu.

¹¹Paycunaga capas nishunquiman: «Aywashun. Runacuna näninpa aywajta pacacuycullar shuyaräshun. Alli runa päsacuycajta wañurachishun.

¹²Alli runacunataga illajpita illgarachishun, gueshya charir imanömi illajpita wañurachin, chayno.

¹³Chayno rurarmi rïcuyäshun. Chaynöpami wasinchichöpis imapis mana pishëmäshunpächu.

¹⁴Juc pachallacho goturpäshun. Llapanta yarpashanchïno rurashun. Guechushanchëga llapanchïpämi canga» nir.

¹⁵Ïju, paycunawanga ama goturaychu. Paycuna yarpashan juchataga ama ruräshiychu.

¹⁶Paycunaga imay örapis yarparaycan mana allita rurayllapämi. Wañuchicuyllatami yarparcaycan.

¹⁷Pichiusacuna ricaycaptenga yangallami trampatapis churanchi.

¹⁸Chay runacunami ichanga quiquin mana alliman chayanallanpaj llapantapis camariycan. Quiquillanmi wañuytapis ashircaycan.

¹⁹Chaynömi yargaj runacunapis: Yargaj-cashallanwanmi wañuytapis tarin.

²⁰Yachayga willacoj warminöpis cällicunachömi, läsacunachömi sinchipa gayacuycan.

²¹May-chaychöpis achca runa cashanchömi willacuycan. Siudäman yaycuna puncucunachöpis willacuycanmi:

²²«Mana tantiyacojcuna, ¿imaycamaraj llutancunallapaj yarparaycanqui? Pitapis mana cäsoj mösucuna, ¿imaycamaraj pï-maytapis asipar cushipanqui? Yarpayniynaj mösucuna, ¿imaycamaraj yachaj caytapis manacajman churarcaycanqui?

²³Willapashäcunata sumaj wiyacuy-llapa. Chauraga nogami llapan yachashäta musyachishayqui. Yarpaynëcho caycajtaga llapantami yachachishayqui.

²⁴Yaparir yaparirmi gamcunataga shamunayquipaj willashcä. Chaypis manami cäsumashcanquichu.

²⁵Chaypa ruquenga willapashäcunatapis manami wiyacushcanquichu. Piñacur tantiyachishäcunatapis manami chasquicushcanquichu.

²⁶Chaypitami mana allicunaman chayaptiqui nogapis cushipäshayqui. Fiyupa manchariycashayqui örami asipäshayquipaj.

²⁷Manchacushayqui löcu tamyano, disigrasya illajpita löcu wayrano chayashuptiqui, ima ruraytapis mana camäpacur fiyupa llaquicuycaptiquimi cushipäshayquipaj.

²⁸«Chay öraga gayacamaptiquipis manami wiyashayquinachu. Ashimarpis manami tarimanquipänachu.

²⁹Gamcunaga yachayta manacajmanmi churaycanqui. TAYTA DIOSTA rispitaytapis manami munanquichu.

³⁰Tantiyachiptëpis manami tantiyacushcanquichu. Piñacur willapashäcunatapis manacajmanmi churashcanqui.

³¹Mana wiyacushayquipitami fiyupa ñacanquipaj. Juchayqui-tupumi fiyupa ñacayman chayanquipaj.

³²Mana tantiyacojcunaga mana tantiyacushanpitami wañuymanpis chayan. Tantiyacuyta mana munajcunapis imapäpis mana yarpachacushpanmi ushacan.

³³Willapashäta chasquicojcunami ichanga cushishalla goyanga. Imapitapis mana manchacuypa goyanga.»