Read Tayta Diosninchi Isquirbichishan Proverbios 10 Bible Online

Proverbios 10 - Tayta Diosninchi Isquirbichishan bible

Proverbios 10

¹Salomón yachaj car rimashan rimaycuna: Yachaj wamraga maman-taytanta cushicachinmi. Mana tantiyacoj wamrami ichanga llaquicachin.

²Mana allicunata ruraypa rïcuyashanga manami dürangachu. Limyu mana yatapacoj cajcunami ichanga wañuypitapis salbacun.

³Alli runacunataga TAYTA DIOS manami muchupacächinchu. Fiyucunatami ichanga micunanpaj ashiptinpis mana tarichinchu.

⁴Mana arucojcunaga imaypis muchupacayllachömi. Alli arojcunapami ichanga ima-aycanpis mana pishinchu.

⁵Alli tantiyacoj runacunaga usya wichanmi micuyninta shuntapacun. Cosëcha wichan puñucuymi ichanga fiyupa pengay.

⁶Alli runapäga bindisyun manami pishinchu. Fiyu runacunatami ichanga quiquin rurashallan mana alliman chayachin.

⁷Alli runataga alli cashanpita fiyupami yarparan. Fiyu runatami ichanga manapis aycällatana gongaycärin.

⁸Yachaj runacunaga willapashancunata llapantami tantiyacun. Mana tantiyar llutanta rimajcunami ichanga ushacaypa aywan.

⁹Pipis mana rimasha limyu runaga cushishami goyäcun. Llutancunacho purejcuna mana allita rurajcunami ichanga mana alliman chayan.

¹⁰Mana allita rurananpaj guepishtapayllapa sëñata rurajcunaga fiyupa llaquicuytami chayachimun. Mana tantiyar manacajcunata rimajcunaga mana alliman chayar ushacangami.

¹¹Alli runacuna willapämashanchëga chuya yacunömi limyu caycan. Fiyu runacunatami ichanga quiquin rurashallan mana alliman chayachin.

¹²Chiquinacuyga pitapis pillyachinmi. Cuyanacuywanga mana allita ruranacushanpitapis perdunanacunmi.

¹³Yachajcuna parlashanchöga fiyupa yachaycunallatami wiyanchi. Mana tantiyacojcunami ichanga mana wiyacushanpita wirucanga.

¹⁴Yachaj runaga alli cajllatami parlan. Mana tantiyajcunami ichanga rimashancunallawan mana alliman chayan.

¹⁵Rïcu runataga ima-aycanpis cashanpitami rispitan. Pobri runatami ichanga imanpis mana captin paypäga pipis mana rimarcunchu.

¹⁶Alli runapaga allita rurashanpitami alli caway pägun. Fiyu runapami ichanga juchayoj cashanpita wañuylla pägun.

¹⁷Corrijishanta wiyacur chasquicojcunaga alli cawaytami tarin. Mana wiyacojcunami ichanga mana alliman chayan.

¹⁸Llulla carmi chiqui cashanta mana musyacächinchu. Upa mana tantiyacöga washa-rima carmi cuentullata purichin.

¹⁹Achcata rimajcunaga llutantapis rimanmi. Yachajcunami ichanga alli cajcunallata rimarcur upällacun.

²⁰Yachaj runa parlashanga guellaynömi bälin. Fiyu runacuna yarpashanmi ichanga imapäpis mana bälinchu.

²¹Alli runacuna willapashanga achcajtami alli goyayta tarichin. Mana tantiyacojcunami ichanga upa caynillanwan wañuytapis tarin.

²²TAYTA DIOSPA bindisyunninwanmi alli cawan. Chay bindisyunwanga manami ima llaquicuypis canchu.

²³Mana tantiyacoj upacunaga juchata rurar cushicunmi. Yachaj runami ichanga yachaj cayninwan cushicun.

²⁴Fiyucunataga manchacushan cajrämi chayanga. Alli runacunami ichanga llapan yarpashanta tarenga.

²⁵Löcu wayra imatapis apacushannömi fiyu runaga illgan. Alli runami ichanga imaycamapis caycanga.

²⁶Cachacojpäga guella runa caycan pochgoj yacu quiruta shimpachishannömi. Cachacojpäga guella runa caycan ñawita goshtay raurächishannömi.

²⁷TAYTA DIOSTA rispitar manchacojcunaga unaycamami cawanga. Fiyu runacunami ichanga pöcu timpulla cawanga.

²⁸Alli runataga ima rurashanpis allimi llojshipanga. Fiyu runami ichanga yanga shuyaranpis.

²⁹Alli runacunataga imapitapis TAYTA DIOSMI chapan. Llutanta rurajcunatami ichanga illgächin.

³⁰Alli runataga manami imapis päsangachu. Fiyu runacunami ichanga jamaytapis mana tarengachu.

³¹Alli runapitaga alli yachachicuycunatami wiyacunchi. Fiyu runacunatami ichanga alli-tucuycajta upällajpaj niycusha.

³²Alli runaga maysi wiyaparäcuyllami parlan. Fiyucunami ichanga mana allicunallata riman.