Read Tayta Diosninchi Isquirbichishan Proverbios 11 Bible Online

Proverbios 11 - Tayta Diosninchi Isquirbichishan bible

Proverbios 11

¹TAYTA DIOS melanäcunmi suwa pësacunataga. Alli pësacunatami ichanga TAYTA DIOS alli rican.

²Alli-tucojcunaga illajpitami pengaycho ricaconga. Umildicunami ichanga yachaj ricaconga.

³Alli runacunaga Dios munashanno rurashpanmi alli cawan. Fiyu runacunami ichanga fiyu llulla cashanpita ñacayman chayan.

⁴Fisyu chayamushan junäga ima riquësanpis manami chapangachu. Juchaynaj limyumi ichanga wañuypitapis salbaconga.

⁵Alli yarpayniyoj runaga allimi purin. Fiyucunami ichanga juchanpita mana alliman chayan.

⁶Alli runacunataga allita rurashanmi salban. Yargajcunaga juchan-tupumi mana alliman chayachin.

⁷Fiyu runa wañuptenga imapaj yarpashanpis illgangami.

⁸Tayta Dios alli runacunataga ñacaypita jorgunmi. Fiyucunatanami ruquin churan ñacananpaj.

⁹Fiyu runaga rimashanwanmi runa-masinta jagayächin. Alli runacunami ichanga yachaj cashanwan piwanpis alli cawan.

¹⁰Alli runacuna alliman chayaptenga marca intërumi cushicun. Fiyu runacuna mana alliman chayaptinpis marca intërumi cushicuywan pinticachan.

¹¹Alli runacuna bindisyunta goptenga marca jatunyanmi. Fiyu runacunapa shiminwanmi ichanga marca ushacan.

¹²Mana tantiyacojcunaga rejsinacushanpa washantami riman. Tantiyaj runami ichanga upälla cacun.

¹³Willapistacunaga imallatapis ushajpämi willacun. Yäracuna runami ichanga imata willapaptinpis upällalla cacun.

¹⁴Mandaj mana alli mandaptenga juc nasyun mana allimanmi chayan. Achcaj tantiyachejcuna alli captinmi ichanga juc nasyun alliman chayan.

¹⁵Jäpa runacunata garantiyäga mana allimanmi chayan. Pitapis mana garantiyajmi ichanga cushisha goyäcun.

¹⁶Alli shongu warmiga rispitashami canga. Fiyu runaga rïcuyayllachömi cacun.

¹⁷Cuyapäcoj runaga quiquinpämi allita ruran. Mana allita ruraj runami ichanga quiquillanmi mana alliman chayan.

¹⁸Fiyucuna mana allita rurar gänashanga manacajnöllami ushacäcun. Alli runacunami ichanga imatapis mana ushacajta chasquenga.

¹⁹Alli cajta rurar goyarga mana ushacaj cawaytami tarin. Mana allita rurajcunami ichanga quiquillan wañuyta ashiycan.

²⁰Jucha rurayllapaj yarparajtaga TAYTA DIOS melanäcunmi. Allita rurar goyajcunatami ichanga alli rican.

²¹Mana allita rurajcunaga simrimi castigacanga. Allita rurajcunami ichanga salbaconga.

²²Yarpayniynaj cuyayllapaj warmiga cuchipa sengancho gori surtïja jatiraycajnömi caycan.

²³Alli runacuna yarpashanga llapanpis allimi camacan. Fiyu runacuna yarpashanmi ichanga pï-maytapis rabyachin.

²⁴Pitapis macyaycöga imallatapis mas-mastami tarin. Pitapis mana macyaycoj cajcunami ichanga muchupacayman chayan.

²⁵Millgaycoj macyaycoj cajcunaga cushishami goyanga. Pitapis goycorga quiquinpis allitami chasquin.

²⁶Micuynincunata churacuycoj micha runacunataga marca-masincuna maldisyuntami gon. Mana churacuypa pitapis ranticoj runami ichanga bindisyunta chasquenga.

²⁷Allita ruraj cajcunapäga imapis allimi canga. Mana allita rurajcunatami ichanga mana alli chayan.

²⁸Charashanman yäracojcunaga yöra tunejnömi ushacanga. Alli runacunami ichanga jacha berdiypa berdir wiñaycajno canga.

²⁹Wasincho imallanpis cajcunata mana cuyapayta yachajcunapaga wasinchöpis wayrami tumaycanga. Chaymi paycunaga alli yachajcunapa uywaynillanna ricaconga.

³⁰Allita ruraj runacunaga alli wayoj yöranömi. Yachaj runaga allita rurashpanmi runacunata mana ushacaj cawayta tarichin.

³¹Cay pachacho alli runacunapis ñacaycaptenga juchasapacunawan fiyu runacunaga imanöraj ñacanga.