Read Tayta Diosninchi Isquirbichishan Proverbios 13 Bible Online

Proverbios 13 - Tayta Diosninchi Isquirbichishan bible

Proverbios 13

¹Alli yachaj wamraga papänin willapashancunata wiyacunmi. Mana rispitacojcunami ichanga piñacushantapis mana wiyacunchu.

²Alli runaga shimillanpitami imatapis allita tarin. Parlashanta mana cumlejcunami ichanga wañuchiyllata yarpapan.

³Shongun musyashallanwan upälla cacojcunaga allimi cawan. Willapistacunami ichanga shimillanpita mana alliman chayanga.

⁴Guellacunaga may-jina imata munaparpis manami tarinchu. Bïbu runami ichanga ima-aycatapis munashanta tarin.

⁵Alli runaga llullacuyta manami munanchu. Fiyu runacunami ichanga jucta pengayman churayllata, manacajman churayllata yarparaycan.

⁶Alli runataga allita rurashancunami mana allipitapis chapan. Jucha rurajcunatami ichanga mana allita rurashancuna illgächin.

⁷Waquin runaga imanpis mana caycaptinmi rïcu-tucun. Waquinnami ima-aycayojpis caycar pobri-tucun.

⁸Rïcu runacunaga ima-aycatapis charashancunawanmi salbacun. Pobritaga pipis manami imata ruraytapis yarpapanchu.

⁹Alli runacunaga chacaycho achqui achicyaycajnömi cushisha goyäcun. Fiyu runacunami ichanga achqui upiptin chacajcho caycajno carcaycan.

¹⁰Alli-tucojcunaga pitapis chiquinacuyllachömi cawachin. Willapashanta wiyacojcunami ichanga yachaj runa.

¹¹Imatapis mana ñacayllapa rätu tarishanga fäsimi ushacäcun. Wallca-wallcalla ñacar shuntashancunami ichanga fäsiga mana ushacangachu.

¹²Runaga yarpashanta mana tariycur fiyupami llaquicun. Llapan yarpashancunata tarirmi ichanga fiyupa cushicun.

¹³Yachachishanta mana wiyacoj cäga fiyupami llaquiconga. Mandamintuta wiyacojcunami ichanga alli cawayta tarenga.

¹⁴Yachaj yachachishanga alli cawananpämi. Wañunanpitami salban.

¹⁵Alli yarpayniyöga pï-maypitapis alli ricashami canga. Llullacunami ichanga mana alliman chayan.

¹⁶Alli yarpayniyojcunaga sumaj tantiyaycurmi imatapis ruran. Mana tantiyacojcunami ichanga upa cayninta musyachin.

¹⁷Fiyu cachaga inrïdumanmi chayachicun. Alli cachami ichanga alli cushicachicun.

¹⁸Willapashanta mana wiyacojcunaga cangapaj manacajman churasha y ushapacajllami. Piñacushanta wiyacojcunami ichanga alli rispitasha canga.

¹⁹Yarpashanta tariycorga runacuna fiyupami cushicun. Mana tantiyacojcunami ichanga mana alli rurayninta mana cachaycunchu.

²⁰Yachaj runacunawan goturarga yachaj caytami yachacunqui. Mana tantiyaj upacunawan goturarmi ichanga pirdicar mana allimanna chayanqui.

²¹Juchasapacunataga imanöllapis disigrasya chayaycanmi. Alli runacunami ichanga allita rurashanpita allillata chasquin.

²²Ima-aycayojpis car alli runaga willcancunatawanrämi raquipan. Juchasapacunami ichanga ima-aycantapis churarächicun alli runacuna rubichanallanpaj.

²³Pobri runacunapa chacranchöga micuy allimi wayun. Mana allita rurarmi ichanga micuynintapis ogran.

²⁴Mana allita ruraptin wamranta mana astejcunaga manami wamranta cuyanchu. Wamranta cuyajmi ichanga imatapis mana allita ruraptin yachacunanpaj tacshanpita-pacha astin.

²⁵Alli runacunaga sacsashancamami micun. Fiyucunami ichanga pachanpis gaullulluycaptin goyan.