Read Tayta Diosninchi Isquirbichishan Proverbios 14 Bible Online

Proverbios 14 - Tayta Diosninchi Isquirbichishan bible

Proverbios 14

¹Yachaj yarpaysapa warmiga wasincho cushisha goyächiytami yachan. Yarpayniynaj upa warmimi ichanga wasincho cajcunata quiquin yamacächin.

²Allita rurar goyäga TAYTA DIOSTAMI sumaj rispitan. Llutanta rurajcunami ichanga TAYTA DIOSTAPIS manacajman churan.

³Mana tantiyacojcunaga alli-tucushpanmi parlan. Yachaj runacunatami ichanga shimin imapitapis chapan.

⁴Yunta mana captenga micuytapis wallcallatami murupacun. Yuntapa callpanwanrämi micuytaga achca achcata murupacur alli shuntanpis.

⁵Alli testïgoga mana llullacuyllapami riman. Alman ranticojcunami ichanga manacajtapis rasun-rasullantaraj rimaycun.

⁶Mana rispitacoj runaga yachaj cayta munarpis manami camäpacunchu. Alli tantiyacoj runami ichanga juclla imatapis yachacurin.

⁷Mana tantiyacoj runataga ama gotuparaychu. Chayno runawan goturarga manami ima allitapis yachacunquipächu.

⁸Yachaj runataga yachashanmi tantiyachin imano goyaycashantapis. Mana tantiyacojcunatami ichanga upa caynin llutanman apan.

⁹Mana tantiyacojcunaga llutanta rurarcurpis manami pengacunchu. Alli runacunami ichanga runa-masinwan cuyanacur alli goyan.

¹⁰Runa llaquicuycashantaga pipis manami musyanchu. Cushisha caycashantapis manami pipis ricanchu. Quiquinpa shongullanmi musyan.

¹¹Fiyu runacunapaga ima-ayca charashallanpis ushacangami. Alli runacunapami ichanga ima-aycanpis yapacanga.

¹²Runataga purishancuna alli-niräpunmi. Ichanga chay caminupa wañuymanmi aywaycan.

¹³Asirpis waquenga llaquishallami caycan. Chaymi cushicurpis ushanantaga wagayman churacan.

¹⁴Mana tantiyacojcunaga imanöpis rurashanpita pägunta chasquenga. Alli runapis alli cajcunata rurashanpita pägunta chasquengami.

¹⁵Mana tantiyacojcunaga imatapis wiyashanta llapantami riguicurcun. Yarpaysapacunami ichanga imatapis manaraj rurar sumaj yarpachacunraj.

¹⁶Yachaj tantiyaj runaga ima mana allimanpis chayayta manchacurmi witicun. Mana tantiyacojcunatami ichanga imapis mana gocunchu.

¹⁷Imallapitapis rabyaj runacunaga mana yarpachacuypami imatapis ruran. Fiyu runacunaga wacpita caypita chiquishami goyanga.

¹⁸Mana tantiyacojcunaga imaypis upa cayllanchömi carcaycanga. Tantiyacur wiyacojcunami ichanga canga sumaj yachaj.

¹⁹Fiyucunaga alli runacunapa maquintapis muchangarämi. Mana allita rurajcunaga ruwacur alli runacunapa puncunta tacangarämi.

²⁰Rïcucunapaga pï-maypis amïgullanmi. Pobricunatami ichanga rejsinacushancunapis manana witipanchu.

²¹Runa-masinta manacajman churarga juchayojmi ricacun. Pobricunata cuyapajcunami ichanga fiyupa cushisha canga.

²²Llutanta rurayta yarpajcunaga pantaycanmi. Allillata yarpajcunami ichanga alli ricasha canga, rispitasha canga.

²³Arucur ruracorga imallatapis tarinmi. Arunanpa ruquin parlallar goyajcunami ichanga imatapis mana tarinchu.

²⁴Yachajcunapaga yachashanmi corönanno caycan. Mana tantiyajcunapami ichanga upa caynillan adurnunno caycan.

²⁵Rasun cajta rimaj testïgoga runa-masin wañunanpaj caycaptinpis salbanmi. Alman ranticojcunami ichanga llullacuyllapa riman.

²⁶TAYTA DIOSTA manchacöga Paymanmi yäracun. Chaymi paytapis wamrancunatapis TAYTA DIOSGA yanapan.

²⁷TAYTA DIOSTA rispitar manchacöga alli cawaytami tarin. Chayno rispitäga wañuypitapis gueshpishanami.

²⁸Aypallata ray mandaptenga llapanpis allimi rican. Wallcallata ray mandaptenga manacajman churashami canga.

²⁹Jinan öra mana rabyaj runaga alli yarpayniyojmi. Jinan öra rabyacurcojmi ichanga upa mana tantiyaj cayninta musyachicun.

³⁰Shacya alli shongu runaga sänumi cawan. Chiquipäcoj mana alli runami ichanga rätu ushacanga.

³¹Pobricunata ñacachejcunaga camaj Tayta Diostami rabyachin. Pobricunata cuyapajcunami ichanga Tayta Diosta rispitan.

³²Fiyu runataga quiquin rurashallanmi mana alliman chayachin. Alli runatami ichanga allita rurashanpita Tayta Dios chapanga.

³³Sumaj alli yachayga caycan alli tantiyajpa umanchömi. Mana tantiyacojcunami ichanga imatapis mana musyanchu.

³⁴Nasyunta mandaj runa Tayta Diosta rispitar mandaptenga runacuna cushishami cawan. Jucha rurayllacho goyarmi ichanga nasyunninta pengayman churan.

³⁵Yarpaysapa uywaytaga ray amatarmi cuyan. Mana tantiyaj uywaytami ichanga fiyu ñawinpa rican.