Read Tayta Diosninchi Isquirbichishan Proverbios 15 Bible Online

Proverbios 15 - Tayta Diosninchi Isquirbichishan bible

Proverbios 15

¹Alli shimillanpa cuticherga rabyaycajtapis allchacächinmi. Tuscu shiminpa cutichirmi ichanga masta rabyachin.

²Yachajcuna parlajta wiyarga allimi yachacun. Mana tantiyajcuna parlarga manacajcunallatami riman.

³TAYTA DIOSGA may-chaychöpis caycanmi. Alli cajcunatapis fiyu cajcunatapis ricaycanmi.

⁴Alli shimillanpa parlajcunaga alli allpacho caycaj yöranömi. Nina shimi runami ichanga runa-masinta llaquicachin.

⁵Mana tantiyacojcunaga papänin corrijishantapis manami cäsunchu. Wiyacojcunami ichanga alli yarpayniyoj cashanta tantiyachicun.

⁶Mana yatapacoj alli runapa wasinchöga ima-aycanpis puchu-puchumi. Fiyu runapami ichanga imata tarishanpis manacajnölla ushacäcun.

⁷Yachajcunaga allita yarpashantami willapäcun. Mana tantiyajcunami ichanga llutallanta yarpan.

⁸Fiyu runacunapataga imata goptinpis TAYTA DIOS manami chasquinchu. Quiquin TAYTA DIOS munashanno cawajcuna mañacuptinmi ichanga cushicun.

⁹Fiyu runacuna llutanta rurar goyashantaga TAYTA DIOS fiyupa melanäcunmi. TAYTA DIOS munashanno goyaj runacunatami ichanga cuyan.

¹⁰Allita ruraycashanpita cachaycojcunataga fiyupa castigarmi piñacun. Piñacushanta mana wiyacojcunami ichanga wañonga.

¹¹TAYTA DIOSGA ricaycanmi wañojcuna maycho caycashantapis. Chayno ricaycarga runa yarpashancunata ¿imanirtaj mana ricanmanchu?

¹²Mana rispitacojcunaga pï piñacuptinpis manami wiyacunchu. Yachajcunawan goturpaytapis manami munanchu.

¹³Shongun cushisha captenga cäranpis cushishami. Shongun llaquisha captenga cäranpis juc-nirajyashami.

¹⁴Alli yarpaysapacunaga imatapis yachacuytami munan. Mana tantiyacojcunami ichanga upa cashallancho cawan.

¹⁵Llaquisha goyajcunapäga imay junajpis mana allillami. Cushisha goyajcunapämi ichanga imay junajpis fistachöno cushicuylla.

¹⁶Pobrilla carpis TAYTA DIOSLLATA manchacur rispitaymi mas alliga, aypalla ima-aycayojpis caycar llaquisha goyänanchïpa ruquenga.

¹⁷Cuyanacur goyashaga yacu calullapis mishquinmi. Aychapis manami mishquinchu mishiwan allgu goyajno goyashaga.

¹⁸Mana rabyaj runaga rimanacuytapis chawächinmi. Imallapitapis rabyacoj runami ichanga juclla piwanpis rimanacun.

¹⁹Guellacunapäga caminunpis casha shata juntashami caycan. Alli runapämi ichanga caminunpis limyu alli puricuy caycan.

²⁰Yachaj wamraga maman-taytantapis cushicachinmi. Mana tantiyaj wamrami ichanga maman-taytantapis manacajman churan.

²¹Mana tantiyacoj runaga upa cayninwan llutanta rurashanpitapis cushicunmi. Alli yarpayniyoj runami ichanga mana pantaypa alli cawan.

²²Shuntacaycur mana parlacuptenga llapan yarpashancunapis manami camacanchu. Achcaj tantiyachejcuna captinmi ichanga yarpashancunapis alli llojshin.

²³Tapucushanta alli cuticherga cushicunmi. Camacashan öra alli willapashanpis mas allimi.

²⁴Alli cajta rurajcunaga janaj pachamanmi aywaconga. Chaynöpami allpa rurinman mana yaycongachu.

²⁵Alli-tucojcuna llapan charashantami TAYTA DIOSGA ushacächin. Biyüdacunapatami ichanga chacrancunatapis chapan.

²⁶Mana allita rurayta yarpajcunataga TAYTA DIOS melanäcunmi. Allillata yarpar parlaj runacunami ichanga cushicachin.

²⁷Imatapis yargaypa-yargar munajcunaga famillyanmanmi disigrasyata chayachimonga. Saynita mana chasquejcunami ichanga alli cawanga.

²⁸Alli runaga imano cutichinanpäpis sumajrämi yarpachacun. Fiyu runami ichanga juclla shimin tarishanta tucuyta riman.

²⁹Fiyu runacunataga TAYTA DIOS manami wiyanchu. Alli runatami ichanga mañacushanta wiyan.

³⁰Alli ñawiwan ricäriptenga jucninpa shongunpis cushicunmi. Chaynöllami alli willapapis cushicachinmi.

³¹Alli cawananpaj willapashanta wiyacojcunaga yachajcunanömi ricasha canga.

³²Corrijishancunata mana wiyacöga quiquillanmi mana alliman chayan. Piñacushanta wiyacojcunami ichanga alli tantiyaj cayta yachacun.

³³TAYTA DIOSTA manchapacur rispitarga yachaj caymanmi chayanga. Pipis rispitamänapäga rimëru pï-maytapis rispitar umildimi caypaj.