Read Tayta Diosninchi Isquirbichishan Proverbios 16 Bible Online

Proverbios 16 - Tayta Diosninchi Isquirbichishan bible

Proverbios 16

¹Runaga imata ruraytapis yarpanmi. Chaypis TAYTA DIOSRÄMI camacächin.

²Runataga llapan rurashancunapis alli-niräpunmi. Chaypis TAYTA DIOSRÄMI nin alli u mana alli yarpashancuna cashantapis.

³Imata ruranayquipaj yarpashayquitapis TAYTA DIOSPA maquinman churay. Paymi camacächenga yarpashayquicuna alli llojshinanpaj.

⁴TAYTA DIOSGA yarpashanno cananpämi llapantapis camasha. Fiyu runacunapämi castïgutaga camasha.

⁵Alli-tucojcunataga TAYTA DIOS melanäcunmi. Chaycunataga simrimi castiganga.

⁶Rasunpa cuyarga juchanpita perdunanmi. TAYTA DIOSTA wiyacorga jucha ruraypita witicunmi.

⁷TAYTA DIOS munashanno runa cawar alli goyaptenga chiquipajcunawanpis allina goyänanpämi camacächin.

⁸Ichicllatapis quiquin ñacar tarishanmi mas alliga engañayllapa ima-aycatapis shuntashanpitaga.

⁹Runaga imata rurananpäpis yarpachacun. Chaypis TAYTA DIOSRÄMI camacächin imano cananpäpis.

¹⁰Rayga Tayta Dios musyachishancunatami riman. Manami llutancunatachu arriglanpis.

¹¹Alli pësa cananpaj, alli tupu cananpäpis TAYTA DIOSMI camacächisha. Chaymi TAYTA DIOS munan alli balansata, alli pësacunata.

¹²Raycunaga mana alli ruraycunata melanäcunmi. Rayga alli mandan llapanpis allillata ruraptinrämi.

¹³Runa mana chapaypa rasun cajta rimaptenga raycuna cuyashpan alli ñawinpami chay runata rican.

¹⁴Ray ollgucurcuptenga wañuchichinanpaj cashan musyacannami. Yachajcunami ichanga rayta ollguycajtapis alliyächin.

¹⁵Ray cushishalla captenga runacunapis allilla goyaytami yarpan. Ray allilla carga timpuncho tamya tamyamushannömi cushicachin.

¹⁶Gorita chararashanpita mas alliga yachaj caymi. Guellaypitapis mas alliga tantiyaj caymi.

¹⁷Alli runacunaga jucha ruraypita witicunmi. Jucha ruraypita witicojcunaga alli cawaymanmi chayanga.

¹⁸Alli-tucojcunaga ushapacangami. Jucta manacajman churajcunaga mana allimanmi chayanga.

¹⁹Alli-tucoj rïcucunawan goturänanpitaga mas alli caycan manacajman mana churaypa pobricunawan goturaymi.

²⁰Tayta Dios nishanta wiyacorga allichömi canga. TAYTA DIOSMAN yäracojcunaga cushishami canga.

²¹Allita yarpachacojcunataga «yarpaysapa» ninmi. Cuyachicuypa parlarga masrämi pitapis aunichin.

²²Alli yarpayniyoj cashanga cawachicoj yacunömi. Mana tantiyacojcunata yachachiyga manacajllapämi.

²³Yarpaysapacunaga sumaj yarpachacurcurmi imatapis riman. Parlashancunaga allimi tantiyachicun.

²⁴Alli shimillanpa parlashanga urunguypa mishquinnörämi. Alli goyaypämi shacyächicun.

²⁵Runataga purishancuna alli-niräpunmi. Ichanga chay caminupa wañuymanmi aywaycan.

²⁶Aroj runaga micunanpämi arun. Micunan-raycumi arun.

²⁷Fiyu runaga rataycaj jurnunömi. Llapan rimashancunapis caycan ninapa wapchayninnörämi.

²⁸Fiyu runacunaga imay örapis rimanacachiyllatami ashiycan. Washa-rimacunapis amïguncunatawan chiquinacachinmi.

²⁹Fiyu runaga amïguntapis engañanmi. Payga amïgunta llutanmanmi gaycun.

³⁰Mana allita rurayta yarpajcunaga ñipchipayllapami sëñata rurashunqui. Mana allita rurariycorga shimi wirpanta amucurcun.

³¹Allillata rurajcunaga chachayänancamami cawan. Sogu caynenga corönanömi cushicachin.

³²Alli chölu-tucuypitaga mas alli pasinsacuymi. Llapan marcapa mandajnin cananpitaga mas alli caycan quiquinraj alli duminacuyta yachashanmi.

³³Imata rurananpäpis runaga surtitami jitan. Chaypis TAYTA DIOSRÄMI camacächin.